काठमाडौँ  । आगामी सातादेखि नेपालका अधिकांश भू-भागमा वर्षा हुने सम्भावना देखिएको छ । बंगालको खाडीमा विकसित भइरहेको न्यूनचापीय प्रणालीको प्रभावका कारण आगामी मंगलबारदेखि करिब एक सातासम्म वर्षा हुनसक्ने सम्भावना देखिएको मौसमविद्हरूले बताएका छन् ।

मौसमविद् डा. विनोद पोखरेलका अनुसार विभिन्न मौसम पूर्वानुमान मोडेलहरूले आगामी मंगलबारदेखि केही स्थानमा भारी वर्षा र असिनासमेत पर्न सक्ने संकेत गरेका छन् ।

“विभिन्न मोडेलले वर्षाको स्थान र मात्राबारे फरक–फरक अनुमान गरेका छन्,” डा. पोखरेलले भने, “त्यसैले अहिले नै कुन ठाउँमा कति वर्षा हुन्छ भन्ने यकिन गर्न कठिन छ । आगामी दिनमा मौसम पूर्वानुमानमा परिवर्तन आउन सक्ने भएकाले पछिल्ला अपडेटलाई ध्यान दिनुपर्छ ।”

मंगलबारअघि नै धान भित्र्याउन किसानलाई सुझाव

वर्षा र असिनाको सम्भावनालाई ध्यानमा राख्दै मौसमविद्हरूले धान काट्ने तयारीमा रहेका किसानलाई मौसम पूर्वानुमान हेरेर मात्र योजना बनाउन सुझाव दिएका छन् ।

अर्को साताको मंगलबारदेखि धान काट्ने योजना बनाएका किसानलाई सम्भव भए त्यसअघि नै धान काटेर सुरक्षित रूपमा भित्र्याउन वा वर्षा रोकिएपछि मात्र काट्न आग्रह गरिएको छ । केही स्थानमा असिनासमेत पर्न सक्ने भएकाले बालीनाली जोगाउन थप सतर्कता अपनाउनुपर्ने मौसमविदको भनाइ छ ।

ट्रेकिङ र यात्रामा निस्कनेलाई चेतावनी

हिमाली क्षेत्रमा मौसम प्रतिकूल हुँदा जोखिम बढ्न सक्ने भएकाले सो क्षेत्रमा यात्रा तथा पदयात्रामा निस्कनेहरूलाई विशेष सावधानी अपनाउन आग्रह गरिएको छ ।

यात्रा वा ट्रेकिङको तयारीमा रहेकाहरूलाई जल तथा मौसम विज्ञान विभागको नियमित मौसम पूर्वानुमान र आधिकारिक सूचनाका आधारमा मात्रै आफ्नो योजना बनाउन सुझाव दिइएको छ ।

मौसम पूर्वानुमान परिवर्तन हुन सक्ने भएकाले सम्भावित वर्षाको प्रभावबाट जोगिन किसान, यात्रु तथा सर्वसाधारण नागरिकलाई पछिल्ला मौसम अपडेटमा निरन्तर ध्यान दिन अनुरोध गरिएको छ ।