काठमाडौं । सल्यानको त्रिवेणीमा शंकास्पद अवस्थामा आमा छोरीको शव फेला परेको छ। त्रिवेणी गाउँपालिका–२ धारढुंगा गाउँकी २९ वर्षीया रेवती थापा र उनकी ९ महिने छोरी ऋतुको आगोमा आधा शरीर जलेको अवस्थामा शव फेला परेको हो। आमा छोरीलाई आगो लगाएर कसैले हत्या गरेको हुनसक्ने आशंका प्रहरीले गरेको छ। रेवतीका पति शुकबहादुर थापा रोजगारीको लागि भारतमा छन्। उनी दुई महिनाअघि मात्रै घरबाट भारत गएका छिमेकीले बताएका छन्। टिनले छाएको घरमा आमा छोरी मात्रै बस्दै आएका थिए। घटनाबारे प्रहरीलाई स्थानीयले शनिबार बिहान साढे ७ बजे खबर गरेपछि आफूसहितको टोली घटनास्थलमा पुगेको छ । उनीहरुको मृत्यु शुक्रबार साँझै भएको हुनसक्ने आशंका प्रहरीले गरेको छ। दुबै शव पोष्टमार्टमका लागि शनिबार साँझ नेपालगञ्ज लगिएको छ। अनुसन्धानका क्रममा धेरैसँग सोधपुछ गरिए पनि अहिलेसम्म कसैलाई पक्राउ नगरिएको प्रहरीले जनाएको छ।