भक्तपुर । भक्तपुरको सल्लाघारीस्थित सडक छेउमा रहेका जोखिमयुक्त रुखहरू धमाधम काट्न थालिएको छ। आइतबार सडक छेउमा रहेको रुखले किच्दा सार्वजनिक बस र स्कुटरमा सवार ३ जनाको निधन भएको थियो। सो घटनामा झण्डै १५ जनाभन्दा बढी घाइते भएका थिए। चोङ्गा गणेश सल्लाघारी दूधपाटी सडक छेउको सल्लाको रुख ढलेपछि सो घटना घटेको थियो। सोही क्षेत्रमा शनिबार पनि एउटा रुख ढलेको थियो। यद्यपि सो रुखले कुनै क्षति भनेको गरेको थिएन। आइतबार ढलेको रुखले क्षति पुर्‍याएपछि स्थानीयहरुको सक्रियतामा जोखिमयुक्त रुखहरू काट्न थालिएको हो। गृहमन्त्री बालकृष्ण खाणले सो घटनाबाट घाइते भएकाहरुको उपचारमा कुनै कसुर बाँकी नराख्न आइतबार नै निर्देशन दिएका थिए।

यी हुन् ज्यान गुमाउने तीन
भक्तपुर नगरपालिका–१ सल्लाघारीस्थित चोङ्गा गणेश सल्लाघारी दूधपाटी सडक छेउको सल्लाको रूख ढलेर बस र स्कुटर किच्दा मृत्यु भएका तीनजनाको पहिचान खुलेको छ। आइतबार दिउँसो काठमाडौँबाट यात्रु बोकेर दूधपाटी हुँदै कमलविनायक जाँदै गरेको बा२ख ३५८४ नंको बस र दूधपाटीबाट सल्लाघारीतर्फ जाँदै गरेको बा ६१ प ३९७८ नंको स्कुटरलाई ढलेको रूखले किच्दा बसमा सवार दुई तथा स्कुटरमा सवार एकजनाको मृत्यु भएको थियो।
मृत्यु हुनेमा बसमा सवार भक्तपुर नगरपालिका–२ व्यासीका २५ वर्षीय विशेष खर्बुजा, चाँगुनारायण नगरपालिका–२ का ५५ वर्षीय न्हुच्छेराम बखाद्यो र स्कुटरमा सवार सर्लाहीको हरिवन नगरपालिका–४ का ४५ वर्षीय राजकुमार भुजेल रहेको महानगरीय प्रहरी परिसर भक्तपुरका प्रहरी नायब उपरीक्षक राजु पाण्डेले जानकारी दिए। दुर्घटनामा घाइते हुनेहरुमा भक्तपुर–१० कमलविनायकका १९ वर्षीय रितिक वासुकला, चानपा–४ चाँगुका १८ वर्षीया निशा लिगल, काठमाडौँ ( १०, बुद्धनगरका ६८ वर्षीय पदमप्रसाद योजु, रामेछापको दोरम्वा गापा–७ घर भई हाल सूर्यविनायक नपा–८ सिपाडोल बस्ने बस चालक २२ वर्षीय हुमबहादुर मगर, सर्लाही घर भई हाल सूर्यविनायक बस्ने १६ वर्षीय आकाश वाइवा र भक्तपुर नपा–७ का १८ वर्षीय सिम्रन लागेजु छन्। उनीहरुको इवामुरा अस्पताल सल्लाघारीमा उपचार भइरहेको छ।
त्यसैगरी उदयपुरको लिचुङ्गु गापा–१ भई हाल काठमाडौँको स्वयम्भु बस्ने ४१ वर्षीय नीलबहादुर राई, पर्वतको जलजला गापा–७ घर भई हाल काठमाडौँको शङ्खमूल बस्ने १९ वर्षीय समीर आचार्य, पाँचथरको याङ्गवरक गापा–३ घर भई हाल भक्तपुरको सल्लाघारी बस्ने १२ वर्षीया समृद्धि लिम्बू, पाँचथरको याङ्गवरक गापा–३ घर भई हाल भक्तपुर सल्लाघारी बस्ने १८ वर्षीया अप्सरा लिम्बू, पर्वतको फलेवास नपा–२ घर भई हाल काठमाडौँ वानेश्वर बस्ने १९ वर्षीय सागर शर्मा र भक्तपुर–८ जेलाकी ४८ वर्षीया लक्ष्मी दुवालसमेत घाइते भएका छन्। उनीहरुको भक्तपुर इन्टरनेशनल अस्पताल कौशल्टारमा उपचार भइरहेको छ।