फिल्म ‘चपली हाइट– २’ बाट फिल्मी करियर सुरु गरेकी नायिका परमिता राज्यलक्ष्मी राणा तेलुगु फिल्ममा खेल्ने भएकी छिन् । सामाजिक सञ्जाल फेसबुकमार्फत् उनले ‘तेलुगु’ फिल्ममा अभिनय गर्न लागेको जानकारी गराएकी हुन् । आगामी वर्षको जुनबाट छायाङ्कन सुरु हुने यस फिल्ममा उनी अडिसनबाट छानिएको समेत जानकारी गराएकी छिन् । एसभीसीसी फिल्म्सको व्यानरमा बन्न लागेको यस फिल्मको पूजा गर्दै शुभसाइत गरिएको छ । तेलुगुका एक्सनस्टार नायक गोपी चन्दको मुख्य भूमिका रहने यस फिल्ममा आफू लिड हिरोइन रहेको र आफूले गोपी चन्दसँग स्क्रिन सेयर गर्न लागेको समेत जानकारी गराएकी छिन् । विनु सुब्रह्मण्यमको डेव्यु निर्देशनमा बन्ने यस फिल्म निकै ठूलो बजेटमा निर्माण हुन लागेको बताइएको छ । एक्सन थ्रिलर जनरामा निर्माण हुने फिल्ममा मणि शर्माको सङ्गीत रहने बताइएको छ । ‘चपली हाइट– २’ पछि रोज, चङ्गाचेट जस्ता फिल्म खेलेकी परमिता ‘चङ्गाचेट’ पछि कुनै पनि फिल्ममा देखिएकी छैनन् ।