काठमाडौं । नेपाल लाइफ इन्स्योरेन्सको बुधबार सम्पन्न बीसौं वार्षिक साधारण सभाले स्टक स्प्लीट अर्थात शेयर टुक्र्याउने प्रस्ताव पारित गरेको छ। साना लगानीकर्ताहरुको समेत कम्पनीको शेयरमा सहज पहुँचका लागि कम्पनीले विद्यमान प्रति शेयर अंकित मूल्य १०० को व्यवस्थालाई परिवर्तन गरि प्रति शेयर अंकित मूल्य ५० कायम गर्ने प्रस्ताव पारित गरेको हो ।
त्यस्तै, साधारण सभाले शेयरधनीहरुलाई चुक्ता पूँजीको ३१ प्रतिशत बोनस शेयर तथा प्रति शेयर २० (कर सहित) नगद लाभांश वितरणको प्रस्ताव पारित गरेको छ । बोनश शेयर वितरण पश्चात कम्पनीको चुक्ता पूँजी ७ अर्ब १९ करोड ९९ लाख ७० हजार ६ सय ६१ रूपैयाँ पुगेको छ।
सभामा कम्पनीका अध्यक्ष गोविन्द लाल संघाईले दुई दशकमा जीवन बीमा क्षेत्रमा कम्पनीको व्यवसायिक हिस्सा र गरिमालाई तमाम चुनौतिहरु बीच अझै नयाँ उचाइमा अगाडि बढाउनका लागि संरचनात्मक सुधार, संस्थागत सुशासनको पूर्ण पालना, सुदृढ आन्तरिक नियन्त्रण प्रणाली, सेवा प्रणालीमा नविन प्रविधिको प्रयोग, सम्पत्ति र दायित्व बीचको सन्तुलन, ग्राहक केन्द्रित योजना, विकेन्द्रिकरण, तालिम एवं अनुसन्धान तथा नयाँ बजारीकरण रणनीति अवलम्बन गरि आगामी दशकको अर्को सुनौलो यात्रा तर्फ अगाडि बढ्ने प्रतिवद्धता व्यक्त गरे।