काठमाडौं। नेकपा एमालेको विवाद शीर्ष नेताहरुबीचमा जुँगाको लडाइँ हो भने केही नेताहरुले आफ्नो भाग गुम्ने डरले पनि शीर्ष नेताहरुलाई सोडा हाल्दा विवाद मिल्ने भन्दा भड्किने अवस्थामा पुगेको छ । नेकपा एमालेका वरिष्ठ नेता माधव कुमार नेपालले आफूहरु कुनैपनि हालतमा अध्यक्ष केपी शर्मा ओलीको टाङमुनि नछिर्ने बताएका छन् । सामूदायिक विद्यालयबाट एसइई र कक्षा १२ उत्तिर्ण गरी चिकित्सा शिक्षा आयोगद्वारा लिईएको एमबिबिएस प्रवेश परीक्षामा सर्वोत्कृष्ट मेधावी छात्र आशिक झालाई सम्मान गर्न आयोजित कार्यक्रमलाई प्रमुख अतिथिको रुपमा सम्बोधन गर्दै उनले यस्तो बताएका हुन् । उनले भने, हामी ओलीको टाङमुनि छिर्नेवाला छैर्नौं, अध्याँरो सुरुङमा जानेवाला छैनौं, दम्भी, अहंकारी र गलत ढंगले चल्नेहरुलाई चूनौति दिईनेछ । तिनीहरुलाई माथ गरेर नै अगाडि बढिनेछ । त्यसो हुनाले यस धर्तीमा साहसी र बहादुर व्यक्तिहरुको मात्रै कदर हुन्छ । कायर र डरपोकहरुको कसैले पनि, र कुनैपनि चर्चा हुँदैन् । दम्भी र घमण्डी नबनेर विनम्र भएर जायज र नाजायज कुराको विश्लेषण गरेर शक्ति र न्यायको बाटोमा निरन्तर अघि बढ्नुपर्छ ।