केही अगाडि एक कार दुर्घटनाको कारण चर्चामा रहेकी मोडल अभिनेत्री परमिता आरएल राणा अहिले फेरि चर्चामा छिन् । यो पटक उनको चर्चा फिल्म ‘दि कर्मा’को कारण भएको हो । फिल्म यही माघ १७ गते शुक्रवारबाट देशव्यापी प्रदर्शनमा आउँदैछ । फिल्मको प्रदर्शन मिति नजिकिँदै गर्दा उनी पनि मिडियामा चारैतिर छाउन थालेकी छन् । एक्सन लभस्टोरी जनरामा निर्माण भएको फिल्म देवकुमार श्रेष्ठले निर्देशन गरेका हुन् । फिल्मले नेपाल र भारतको सीमा क्षेत्रमा हुने घटनाको विषय उठाउने कोसिस गरेको छ । फिल्ममा उनले नकारात्मक भूमिका निर्वाह गरेकी छन् । फिल्मको आफ्नो भूमिका दर्शकले रुचाए आगामी दिनमा पनि फेरि नकारात्मक भूमिका निर्वाह गर्ने उनको सोच रहेको छ । ‘दि कर्मा’मा अहिलेसम्मकै फरक र बोल्ड भूमिका निर्वाह गरेको छु’, परमिताले भनिन्– ‘यसको भूमिका मेरो प्रयोग पनि हो ।’ परमिताको यसअगाडि केही फिल्म प्रदर्शनमा आइसकेका छन् । तर उनले सफलताको स्वाद भने चाख्न पाएकी छैनन् । ‘दि कर्मा’ विषयवस्तु, निर्माण र भूमिका सबै फरक भएकाले सफल हुने उनले अनुमान लगाइन् । फिल्मको केही पहिले ट्रेलर सार्वजनिक भएको थियो । ट्रेलरमा रहेको परमिताको लुक्सले दर्शकको ध्यान तान्न सफल भएको छ । फिल्ममा उनी बुद्धि तामाङको जोडी बनेकी छन् । बुद्धिसँग जोडी बनेर काम गर्न पाउँदा बेग्लै अनुभव भएको उनले सुनाइन् । फिल्ममा भारतीय कलाकार करण वर्माको पनि अभिनय रहेको छ । जय मिडिया म्यानेजमेन्ट र श्रीत फिल्मस् एन्ड इन्टरटेन्मेन्टको व्यानरमा निर्माण भएको फिल्म जयराज राय, श्रीदेव बीएल र निशा खतिवडाले मिलेर बनाएका हुन् । शारदा खड्का अर्याल सहनिर्मात्री रहेको फिल्ममा फिल्ममा परमिताको अलवा नीता ढुङ्गाना, देवकुमार श्रेष्ठ, अनुप सक्सेना, सङ्गीता नापितलगायतका कलाकारको पनि अभिनय छ ।