काठमाडौं । चर्चित राजनीतिक अभियन्ता युवराज सफल म्युजिक भिडिओ मोडलको नयाँ अवतारमा देखा परेका छन् । उनले अभिनय गरेको पहिलो म्युजिक भिडिओ हिजो युट्यूवमा रिलिज भएको छ । म त ज्यूँदै मरेकी छु, बोलको विरही गीतमा युवराज सफलले मोडलिङ गरेका हुन् । उनलाई अभिनेत्री नम्रता सापकोटाले साथ दिएकी छन् । श्रीमानबाट धोका पाएकी पत्नीको भूमिकामा नम्रता छिन् भने युवराज सफल उनलाई सहारा र सान्त्वना दिइरहेका देखिन्छन् । सफलको अभिनयमा भने कुनै दम छैन । भिडिओको अन्त्यमा सफलको डाइलग छ, अब म ज्वाईंलाई मुद्दा हाल्दिन्छु । गीतका शब्दहरु युवराज सफलले नै लेखेका हुन् । गीतमा गायिका निरा रानाभाटको एकल आवाज छ । संगीत कृष्ण भारद्वाजले दिएका हुन् भने एरेन्ज बाबुल गिरीले गरेका हुन् । गीतको म्युजिक भिडिओ राहुल बराइलीले निर्देशन गरेका छन् । भिडिओमा अनुपजंग थापा र सजिना लामिछाने पनि देखिन्छन् । गीत समग्रमा कर्णप्रिय नै छ । तर, भ्यूज गतिलो पाइरहेको छैन । कमेन्टमा धेरैले युवराज सफललाई ट्रोल गरेका छन् ।