काठमाडौं । पार्टी एक भएको देखाएर २३ जनाको हस्ताक्षर अन्योलमा पार्दै सर्वोच्च अदालतको फैसला प्रभावित पार्ने योजना असफल भएपछि केपी ओली नेतृत्वको सरकार ढल्न पुगेको छ । प्रधानमन्त्री केपी शर्मा ओलीले सोमबार साँझ राष्ट्रपति विद्यादेवी भण्डारीलाई भेटेका छन् । शितलनिवासमा ४० मिनेटको भेटमा सर्वोच्च अदालतको फैसलापछि चाल्ने कदमबारे छलफल भएको हो । राष्ट्रपति भण्डारीसँग ओलीले राजीनामाबारे छलफल गरेका छन् । उनले सर्वोच्च अदालतको आदेश पालना गर्ने र त्यसपछि उत्पन्न हुने परिस्थितिबारे कुराकानी गरेका हुन् । राष्ट्रपति भण्डारीसँग प्रधानमन्त्री ओलीको साँझ १८ः५० देखि १९ः३५ सम्म कुराकानी भएको थियो ।