काठमाडौं । अमेरिकाले इरानमाथिको सैन्य आक्रमणलाई थप तीव्र बनाएको छ। अन्तर्राष्ट्रिय सञ्चारमाध्यमका अनुसार शुक्रबार राति पनि अमेरिकी सेनाले इरानका विभिन्न प्रान्तमा हवाई हमला जारी राखेको छ।

इरानको स्वास्थ्य मन्त्रालयका अनुसार हालसम्मका आक्रमणमा कम्तीमा ३८ जनाको मृत्यु भएको छ भने ४०० भन्दा बढी घाइते भएका छन्। आक्रमणका क्रममा पुल, ऊर्जा पूर्वाधार तथा समुद्री नियन्त्रण टावरजस्ता नागरिक संरचनामा समेत क्षति पुगेको जनाइएको छ।

इरानको सरकारी सञ्चारमाध्यम प्रेस टीभीका अनुसार होर्मोजगन, बुसेहर, सिस्तान–बलूचिस्तान, खुजेस्तान र लोरेस्तान प्रान्त आक्रमणको मुख्य निशानामा परेका छन्।

चाबहारस्थित शाहिद कलान्तरी बन्दरगाहको समुद्री नियन्त्रण टावर पूर्ण रूपमा ध्वस्त भएको छ। यद्यपि बन्दरगाहको कार्गो सुविधा र अन्य मुख्य संरचनामा ठूलो क्षति नभएको इरानी पक्षले जनाएको छ।

अमेरिकी सेन्ट्रल कमान्ड (सेन्टकम) ले उक्त निगरानी टावर सफलतापूर्वक नष्ट गरिएको पुष्टि गर्दै यसलाई इस्लामिक रिभोलुसनरी गार्ड (आईआरजीसी) ले ओमानको खाडी र होर्मुज जलमार्गमा समुद्री गतिविधि निगरानी गर्न प्रयोग गर्ने प्रमुख केन्द्र भएको दाबी गरेको छ।

इरानी समाचार एजेन्सी इरनाका अनुसार प्राविधिक टोलीले क्षतिको मूल्याङ्कन सुरु गरिसकेको छ। सुरक्षा जाँच सम्पन्न भएपछि बन्दरगाहको कार्गो सञ्चालन पुनः सुरु गरिने तयारी भइरहेको छ।

होर्मोजगन प्रान्तमा भएको आक्रमणले खमीर काउन्टीका छ वटा पुलमा क्षति पुर्‍याएको छ। प्रान्तीय प्रशासनका अनुसार उक्त क्षेत्रमा सात जनाको मृत्यु र नौ जना घाइते भएका छन्। आक्रमणका कारण बन्दर अब्बास, बन्दर खमीर र लार जोड्ने यातायात मार्ग पनि प्रभावित भएको छ।

बन्दर अब्बासको आवासीय क्षेत्रमा भएको अर्को आक्रमणमा एक जनाको मृत्यु तथा आठ जना घाइते भएका छन्। त्यहाँको रेलवे शाखा स्टेसनमा समेत क्षति पुगेको जनाइएको छ।

बुसेहर प्रान्तमा केही घण्टाको अन्तरालमा दुई पटक आक्रमण भएको स्थानीय प्रशासनले जनाएको छ। त्यहाँ एक जना घाइते भएका छन्।

खुजेस्तान प्रान्तको अहवाज आसपासका क्षेत्रमा पनि अमेरिकी आक्रमण भएको पुष्टि भएको छ। यसअघि इरानी अधिकारीहरूले क्यान्सर उपचारका लागि परिचित शाहिद बाघाई अस्पताल नजिक आक्रमण भएपछि अस्पताल अस्थायी रूपमा खाली गर्नुपरेको बताएका थिए।

लोरेस्तान प्रान्तको चेगेनी काउन्टीस्थित वेसियान क्षेत्रमा पनि हवाई हमला भएको स्थानीय प्रशासनले जनाएको छ।

सेन्टकमले तटीय निगरानी प्रणाली, हवाई प्रतिरक्षा संरचना र समुद्री सैन्य क्षमतामाथि लक्षित आक्रमण गरिएको जनाएको छ। अमेरिकाले आफ्नो कारबाहीको उद्देश्य इरानको सैन्य क्षमता कमजोर बनाउनु र क्षेत्रीय सुरक्षामा देखिएको खतरा न्यूनीकरण गर्नु रहेको दाबी गरेको छ।

यता इरानले भने अमेरिकाले नागरिक पूर्वाधारलाई निशाना बनाएको आरोप लगाउँदै बहराइन, कुवेत, सिरिया र ओमानस्थित अमेरिकी सैन्य अड्डामाथि जवाफी कारबाही सुरु गरिएको दाबी गरेको छ।