काठमाडौं। फ्रान्सका कप्तान किलियन एमबाप्पे फिफा विश्वकप २०२६ मा सर्वाधिक गोल गर्ने खेलाडी बनेका छन्। तेस्रो स्थानका लागि भएको प्लेअफमा इंग्ल्यान्डविरुद्ध दुई गोल गरेपछि उनले प्रतियोगितामा आफ्नो गोल संख्या १० पुर्‍याएका हुन्।

यद्यपि उक्त खेलमा फ्रान्स ६–४ गोलअन्तरले इंग्ल्यान्डसँग पराजित भयो र इंग्ल्यान्डले तेस्रो स्थान हासिल गर्‍यो।

दुई गोलसँगै एमबाप्पेले विश्वकप इतिहासमा आफ्नो कुल गोल संख्या २२ पुर्‍याउँदै नयाँ कीर्तिमान पनि बनाएका छन्। उनले तीन संस्करणको विश्वकपमा यो उपलब्धि हासिल गरेका हुन्।

जारी विश्वकपमा अर्जेन्टिनाका कप्तान लियोनल मेसीको नाममा ८ गोल रहेको छ। मेसीले स्पेनविरुद्धको फाइनल खेल खेल्न बाँकी रहेकाले आफ्नो गोल संख्या अझ बढाउने अवसर भने कायम छ।

एमबाप्पेको १० गोलसँगै उनी ‘गोल्डेन बुट’ जित्ने दौडमा सबैभन्दा अगाडि पुगेका छन्। विश्वकपमा सर्वाधिक गोल गर्ने खेलाडीलाई प्रदान गरिने यो व्यक्तिगत अवार्डका लागि अब फाइनल खेल निर्णायक बन्नेछ।

एमबाप्पेले यसअघि सन् २०२२ को विश्वकपमा पनि गोल्डेन बुट जितेका थिए। यसपटक पनि उनी लगातार दोस्रो पटक उक्त अवार्ड जित्ने बलियो दाबेदारका रूपमा उभिएका छन्।