काठमाडौं । बुधबार बिहान ८ बजेका लागि नेपाली कांग्रेस संस्थापन पक्षले बोलाएको केन्द्रीय कार्यसमिति बैठक केही बेरमा बस्दैछ । बिहान ८ बजे बस्ने गरी बोलाइएको केन्द्रीय कार्यसमिति बैठक दिउँसो बस्न लागेको हो । यो बैठकले दोस्रो विशेष महाधिवेशन आयोजक महामन्त्रीद्वय गगनकुमार थापा र विश्वप्रकाश शर्मासहितलाई कारबाहीको तयारी गरेको छ । नेपाली कांग्रेसका केन्द्रीय सदस्य गुरू बरालले केही बेरमा केन्द्रीय कार्यसमिति बैठक बसेर विशेष महाधिवेशन पक्षधरलाई कारबाहीको तयारी गरेको बताएका छन् । बरालका अनुसार महामन्त्रीद्वयले सभापति देउवा नेतृत्व छोड्नुपर्ने र आगामी फागुन २१ गतेको चुनाव पनि नलडी आराम गर्नुपर्ने भनेर राखेको शर्तमा कुरा मिलेन । अरू सबै विषयमा सहमति जुट्ने अवस्था देखिए पनि देउवाले नेतृत्व नछाड्ने अड्डी कसेपछि कांग्रेस इतिहासमै तेस्रो पटक फुटतर्फ अग्रसर भएको हो । तर बरालका अनुसार देउवाले कांग्रेस नेतृत्व छाडे पनि आगामी संसदीय चुनाव लड्न दिनुपर्ने बताएका थिए । तर महामन्त्रीद्वयले चुनाव पनि लड्न नपाउने अडान राखेपछि कुरा मिल्न नसकेको उनले बताएका छन् । उहाँहरूले चुनाव पनि लड्नै नपाउने अडान राख्नु भयो । सभापतिले नेतृत्व छाड्छु तर चुनाव लड्छु भन्दा पनि मान्नु भएन, बरालले भने, हरसम्भव प्रयास गरियो तर सकिएन । अब सानेपामा केन्द्रीय कार्यसमिति बैठक बसेर कारबाहीको तयारी भएको छ। बुधबार बिहान महाराजगञ्जमा सभापति देउवा तथा महामन्त्रीद्वय गगन थापा र विश्वप्रकाश शर्माबीचको वार्तामा सहमति नजुटेसँगै कांग्रेस फुटतर्फ अग्रसर भएको छ। मंगलबार पनि दिउँसो हिजो १ बजे बोलाइएको केन्द्रीय कार्यसमिति बैठक बेलुकी साढे ७ बजे सुरु भएलगत्तै स्थगित भएको थियो। यता भृकुटीमण्डपस्थित विशेष महाधिवेशनस्थलमा मनोनयन दर्ता सकिएको छ। सभापतिदेखि केन्द्रीय कार्यसमिति सदस्यका उम्मेदवारसम्मले मनोनयन दिइसकेका छन् । अब त्यहाँ निर्वाचन प्रक्रिया अघि बढिसकेको छ।