प्रियंका चोपडाका जेठाजु जो जोनस र जेठानी सोफी टर्नरले सम्बन्धविच्छेद गर्न लागेको खबर छ । यी जोडीका दुई सन्तान छन् । तर अब विवाहको ४ वर्षपछि यी दुई अलग्गिन लागेको खबरले प्रशंसक चकित परेका छन् ।
टिएमजेडको रिपोर्ट अनुसार सोफी र जो जोनस पछिल्लो ६ महिनादेखि असाध्यै ठुलो समस्याको सामना गरिरहेका छन् । त्यसैले स्थिति सम्बन्धविच्छेदसम्म पुगेको छ ।
नजिकको स्रोतलाई उद्धृत गर्दै जो जोनस र उनको समूहले लस एन्जिलिसमा दुई जना डिभोर्स लयर्ससँग कुराकानी गरिरहेको जानकारीमा उल्लेख छ ।
रिपोर्टमा दाबी गरिए अनुसार जो जोनसले सोफीसँगको वैवाहिक सम्बन्ध तोड्न प्रक्रिया अघि बढाउन चाहेका छन् ।
एक अन्तर्राष्ट्रिय प्रकाशनका अनुसार जोनस ब्रदर्स टुरका बेला जो जोनसका दुवै छोरीहरू उनीहरूसँगै थिए ।
रिपोर्टमा दाबी गरिए अनुसार हालै जो जोनसलाई विवाहको औँठी बिना नै देखिएको थियो । त्यसपछि नै उनको वैवाहिक सम्बन्धमा खटपट आएको हो कि भनेर धेरैले अनुमान गरेका थिए ।
यस्तै, जो र सोफीले हालै मियामीमा आफ्नो संयुक्त घर पनि बेचेको जानकारीमा उल्लेख छ । यो जोडीले एक वर्ष अघि मात्रै यो घर किनेका थिए ।
यद्यपि, जो जोनस वा सोफी टर्नरमध्ये कसैले पनि सम्बन्धविच्छेदको खबरमा प्रतिक्रिया दिएका छैनन् ।
प्रियंकाका जेठाजु जो जोनस ३४ वर्षका भए । उनले सन् २०१६ मा सोफी टर्नरलाई डेट गर्न सुरु गरेका थिए । त्यसपछि यी दुईले सन् २०१९ मा विवाह गरेका थिए ।
सोफी टर्नर चर्चित हलिउड अभिनेत्री हुन् । उनले ‘द गेम अफ थ्रोन्स’ मार्फत् विश्वमाझ पहिचान पाइन् । यस्तै जो जोनस एक गायक र अभिनेता हुन् ।