काठमाडौं । प्रधानमन्त्री केपी शर्मा ओलीले अमेरिकी अनुदान सहयोगअन्तर्गत मिलेनियम च्यालेन्ज कर्पोरेशन (एमसीसी)सँग भएको सम्झौता संसदको चालू अधिवेशनबाट चाँडै पारित हुने बताएका छन् । प्रधानमन्त्री निवास बालुवाटारमा सम्पादहरुसँगको छलफलका क्रममा प्रधानमन्त्री ओलीले एमसीसीका विषयमा जनमानसमा एक किसिमको भ्रम फैलाइएको भए पनि सम्झौता उचित रहेको र चाँडै पारित हुने बताएका हुन् ।
‘पुरानै सरकारले सम्झौता गरेको भए पनि उचित सम्झौता भएको छ’, प्रधानमन्त्री ओलीले भने, ‘संसदको यही अधिवेशनबाट एमसीसी चाँडै पारित हुन्छ ।’ उनले प्रेस स्वतन्त्रमा कुनै बन्देज नहुने पनि बताए । मनोबल गिराउने गरी समाचार प्रकाशन, प्रसारण तथा सम्प्रेषण नगर्न समेत प्रधानमन्त्रीको आग्रह थियो ।
प्रधानमन्त्री ओलीले मानव अधिकारको सुरक्षाका लागि सरकार दत्तचित्त भएर लागेको बताए ।
‘मानव अधिकार हननमा चिन्ता लिनु पर्दैन, कहीँ केही त्रुटी भएमा सच्याउन सकिन्छ’, प्रधानमन्त्री ओलीले भने । उनले विप्लव नेतृत्वको नेकपाका गतिविधिलाई प्राथमिकता नदिन समेत आग्रह गरेका छन् ।
‘विप्लव नामको समूह पैसा लुट्न, आतंक मच्चाउन हिँडेको छ ।’ प्रधानमन्त्री ओलीले भने, ‘अब अर्को क्रान्ति जरुरी छैन कल्पना पनि नगर्नुस्, विप्लव समूह व्यवस्था सुधारका नाममा अर्थ संकलनमा उद्दत छ ।’
उनले बम, बन्दुक सहित पक्राउ परेका केही मानिसहरु छुटेको भन्दै यसमा राज्य संयन्त्रको भूमिका कमजोर रहेको स्वीकार गरे । उनले वर्तमान सरकार आन्दोलनको उपच भएको हुँदा जनताप्रति पूर्ण उत्तरदायी हुने प्रष्ट्याए । प्रधानमन्त्री ओलीले पार्टी तथा सरकारलाई धेरै चुनौती भए पनि यसको सामना गर्न आफू तयार रहेको बताए ।
‘जुनसुकै परिवर्तन सम्झौतामा टुंगिएको हुँदा सबै भनेको जस्तो पूरा हुन सम्भव हुँदैन, यस्तो अवस्थामा पनि सरकारले धेरै काम गरेको छ ।,’ प्रधानमन्त्री ओलीले भने ।
उनले आफ्नो स्वास्थ्य अवस्थाका विषयमा समेत सम्पादकलाई जानकारी गराएका थिए । आफूले चाँडै किड्नी ट्रान्सप्लान्ट गर्ने जानकारी दिँदै अझै आफू तीन वर्ष प्रधानमन्त्री रहने समेत बताएका थिए ।