काठमाडौं । उद्योग, वाणिज्य तथा आपूर्ति मन्त्री गौरी कुमारीले नेपाली चिया निर्यातमा देखिएको समस्याको दीर्घकालीन समाधानका लागि सरकारले कूटनीतिक पहल तीव्र बनाएको बताएकी छन् ।

बुधबार प्रतिनिधिसभा बैठकमा सांसदहरूले उठाएका प्रश्नको जवाफ दिँदै मन्त्री कुमारीले भारततर्फ चिया निर्यातमा देखिएको अवरोध हटाउन सरकार सक्रिय रूपमा लागिरहेको जानकारी दिइन् ।

‘समस्याको दीर्घकालीन समाधानका लागि भारत सरकारसँग कूटनीतिक पहल भइरहेको छ । यस सम्बन्धमा भारत सरकारलाई पत्राचार गरिएको छ भने चिया व्यवसायीसँग पनि निरन्तर छलफल भइरहेको छ,’ उनले भनिन्, ‘भारतस्थित नेपाली दूतावासमार्फत समन्वयको काम जारी छ ।’

मन्त्री कुमारीका अनुसार नेपालमा हाल वार्षिक करिब २ करोड ६१ लाख किलो चिया उत्पादन हुँदै आएको छ । देशका १८ जिल्लामा २० हजार ६ सय हेक्टर क्षेत्रफलमा चिया खेती भइरहेको उनले बताइन् ।

आर्थिक वर्ष २०८१/८२ मा नेपालबाट ४ अर्ब ५९ करोड रुपैयाँ बराबरको चिया निर्यात भएको तथ्यांक प्रस्तुत गर्दै उनले नेपाली चियाको ८० देखि ९० प्रतिशत हिस्सा भारतमै निर्यात हुने गरेको जानकारी दिइन् ।

भारतमा निर्भर निर्यात बजारका कारण बेला–बेलामा नेपाली चिया व्यवसायीले विभिन्न अवरोध र समस्या झेल्दै आएका छन् । सरकारले यसलाई दीर्घकालीन रूपमा समाधान गर्न कूटनीतिक तथा व्यापारिक पहल अघि बढाएको जनाएको छ ।