काठमाडौं । काठमाडौं महानगरपालिकाका वडाध्यक्षहरुले कार्यपालिका बैठकको माग गर्दै मेयर बालेन्द्र शाह (बालेन) लाई ज्ञापनपत्र बुझाएका छन् । महानगर प्रवक्तासमेत रहेका १७ नम्बरका अध्यक्ष नवीन मानन्धरलगायत १८ वडाध्यक्षले ज्ञापनपत्र बुझाएका हुन् । प्रमुख प्रशासकीय अधिकृतको रिक्तताले उत्पन्न समस्याका विषयमा छलफल गर्न कार्यपालिकाको बैठक बोलाउनुपर्ने उनीहरुको माग छ । ज्ञापनपत्रमा ५ जना कार्यपालिका सदस्यले समेत हस्ताक्षर गरेका छन् । मेयर शाहलाई ज्ञापनपत्र बुझाउनुअघि शुक्रबार १२ नम्बरका वडाध्यक्ष बालकृष्ण महर्जनको अध्यक्षतामा १६ वडाध्यक्षबीच बैठक भएको थियो । सो बैठकले दुई वटा निर्णय गरेको थियो । बैठकले महानगरपालिकाका प्रमुख प्रशासकीय अधिकृत सरोज गुराराईंलाई गरिएको भनिएको कारबाही प्रकियाको बारेमा लिखित रुपमा मेयर शाहसँग जानकारी माग गर्ने र महानगरको कार्यपालिकाको बैठक तत्काल बोलाउन लिखित माग गर्ने सहमति भएको थियो । सोही सहमतिअनुसार आज मेयर शाहलाई भेटेर ज्ञापनपत्र बुझाइएको हो, तर मेयरलाई बुझाइएको ज्ञापनपत्रमा भने कार्यपालिका बैठक बोलाउने विषयमात्रै उल्लेख गरिएको छ । ज्ञापनपत्र बुझाउन नेतृत्व लिएका प्रवक्ता नवीन मानन्धरले कार्यपालिका बैठकमा प्रमुख प्रशासकीय अधिकृतको विषयमा छलफल गर्न बैठक बोलाउन माग गर्दै ज्ञापनपत्र बुझाएको बताए । उनले भने, प्रमुख प्रशासकीय अधिकृत नभएकाले काम कारबाही ठप्प भइराखेको अवस्था छ । यो विषय कार्यापालिकामा उठाउनुपर्‍यो भनेर हामीले ज्ञापनपत्र बुझाएका हौं । मेयरसाबले पहल गर्छु भन्नुभएको छ ।

प्रकाशमान सिंहलाई बालेनको सुझाव
काठमाडौं महानगरपालिकाका मेयर बालेन्द्र शाहले उपप्रधान तथा सहरी विकासमन्त्री प्रकाशमान सिंहप्रति असन्तुष्टि पोखेका छन् । पिता गणेशमान सिंह, पीएल सिंह र नेपाली कांग्रेसको इतिहास माटोमा नमिसाउन उनको सुझाव छ । फेसबुकमा स्टाटस लेख्दै मेयर शाहले यस्तो सुझाव दिएका हुन् । काठमाडौंका अव्यवस्थित बस्ती हटाउने, कपन खोलालाई व्यवस्थित गर्ने, बाल मन्दिर बचाउने, सार्वजनिक सम्पत्ति जोगाउने प्रयास गर्ने कुराहरु सधैँ कुरामै सीमित रहेको आरोप पनि उनले लगाएका छन् । मलाई हराउने नाममा आफ्नो शहर, क्षेत्र र देश चाहिँ नहराउनुहोला, यत्रो गणेशमान सिंह, पीएल सिंह र नेपाली कांग्रेसको इतिहास माटोमा नमिसाउनु होला, बालेनले लेखेका छन् ।