विकासराज आचार्यद्वारा निर्देशित चलचित्र ‘नाईं नभन्नू ल ६’को पहिलो गीत सार्वजनिक गरिएको छ । सोमबार युट्युब रिलिज भएको ‘दिउँला माया’ बोलको रोमान्टिक थिमको गीतमा फिल्मका प्रमुख डेब्यू अभिनेता आशिर्वाद क्षेत्री र अभिनेत्री आँचल शर्मा फिचर्ड छन् । गीतले यी दुईको प्रेमभाव बोल्छ । गीतमार्फत् आँचलले निभाएको चरित्रलाई गायनप्रति रुचि रहेको बुझाउन खोजिएको छ ।
शरद शंकर र बेनिशा पौडेलको युगल स्वर रहेको गीतमा निर्देशक आचार्य स्वयंको शब्द र गायक शंकरको संगीत छ । ‘नाईं नभन्नू ल’का सिरिज गीतमा अब्बल मानिन्छन् । ‘बालापनको उमेर’, ‘मर्ने कसैलाई रहर हुँदैन’, ‘तिम्रो आँखामा आँखा जुधाई’, ‘मैना राजा मैना रानी’, ‘यी आँखामा तिमी छौं’ जस्ता यी सिरिजका चर्चित गीतहरु हुन् । ‘दिउँला माया’को पनि अडियो पक्ष बलियो देखिन्छ ।
नयाँ वर्षको अवसर पारेर आगामी बैशाख १ गतेबाट प्रदर्शन हुन लागेको फिल्ममा आशिर्वाद र आँचलसँगै केकी अधिकारी, प्रियंका कार्की, सरोज खनाल, निखिल उप्रेतीका छोरा अर्थवको पनि मुख्य भूमिका छ । ‘नाईं नभन्नू ल’ सिरिजको पर्यायझैं बनेका अनुभव रेग्मी भने यसमा केमियो भूमिकामा छन् । फिल्मलाई निर्देशक आचार्य, सामीप्यराज तिमल्सिना र अरुणदेव जोशीले लेखेका हुन् ।
आख्यान फिल्म्सको ब्यानरमा निर्माण भएको फिल्मको निर्मातामा विकासराज आचार्य र विष्णुमणि दाहाल छन् भने सञ्जय न्यौपाने, रमेश चौधरी, पुरुषोत्तम प्रधान कार्यकारी निर्मातामा छन् । चलचित्रमा हिमाल केसीको द्वन्द्व निर्देशन, पुरुषोत्तम प्रधानको छायांकन, सन्देश शाहको सम्पादन, एलिस कार्कीको ब्याकग्राउन्ड स्कोर, कविराज गहतराज र मनोज विश्वकर्माको कोरियोग्राफी रहेको छ ।