काठमाण्डौ । प्रधानमन्त्री केपी शर्मा ओली अहिले सरकार नियुक्ति भएको दोस्रो दिन देखि नै कोरोना र यसको प्रभावबारे आर्थिक र स्वास्थ्य क्षेत्रका विभिन्न व्यक्तिहरूसँग छलफल गर्दै छन् । कोरोनाको दोस्रो भेरियन्ट सक्रिय भएपछि र यसले विपत्ति नै निम्त्याएपछि प्रधानमन्त्री ओलीले पहिलोपल्ट चिकित्सा क्षेत्रका विज्ञ र उद्योगी, व्यवसायीहरूसँग छलफल गर्न लागेका हुन् । “स्वास्थ्य क्षेत्रका सम्बन्धित विज्ञहरू, निजी क्षेत्रसँग छलफल गर्न लागिएको हो । ती सबैसँग सुझाव पनि लिने र सरकारले चालेका कदमहरू प्रभावकारी छन् कि छैनन्, अथवा के कस्ता कदम बढ्ता प्रभावकारी हुनसक्छन् भनेर राय–सुझाव लिने हिसाबले बैठक बोलाइएको हो,” प्रधानमन्त्रीका सञ्चारविज्ञ रामशरण बजगाईंले बताएका छन् । सरकार बजेट निर्माणमा चटारिएका बेला कोरोनालक्षित आर्थिक पुनरूत्थानको प्याकेज के हुनसक्छ भनेर पनि छलफल हुने बताइएको छ ।