प्रकाश सपुतको डेब्यू निर्देशनमा तयार भएको फिल्म ‘बसन्त’को छायांकन सकिएको छ । यो फिल्मको छायांकन ३८ दिनमा सकिएको निर्माणपक्षले बताएको छ । बुधवार काठमाडौंमा फिल्मको अन्तिम दृश्यको छायांकन गरियो । यो फिल्मको प्रदर्शन मिति चैत्र २२ गतेलाई तोकिएको छ । फिल्मको निर्माणमा आफू र आफ्नो टिमले निकै मिहिनेत गरेकाले आफूले खोजेको र सोचेको जस्तै नतिजा निस्कनेमा गायक, नायक तथा निर्देशक सपुतले विश्वास गरेका छन् । यो फिल्ममा सपुतसहित स्वस्तिमा खड्का, प्रभात पाल ठकुरी, खड्क बहादुर पुन, शिवांशी श्री, अनुप बराल, कमलमणी नेपाल, प्रकाश घिमिरे लगायतका कलाकारहरुको अभिनय रहनेछ । यो सोसल ड्रामा फिल्ममा कथा, पटकथा तथा संगीत पनि सपुतले नै तयार पारेका हुन् । विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा फिल्मले भन्नेछ । गलबन्दी प्रोडक्सनको प्रस्तुति रहेको यो फिल्ममा कार्यकारी निर्मातामा मोहन विश्वकर्मा, अनुरोध भट्टराई, नाना थकाली छन् । सुसन प्रजापतिको यो फिल्ममा छायांकन छ ।