काठमाडौं । काठमाडौं महानगरपालिकाका मेयर बालेन्द्र साहलाई एक हप्ताभित्र तलब पाउने अवस्था बनाइदिन कर्मचारीहरूले अल्टिमेटम दिएका छन् । स्थानीय तह कर्मचारी संघले आज विज्ञप्ति जारी गर्दै फेसबुकमा स्टाटस लेखेर दम्भ देखाउनुभन्दा समस्या समाधानका लागि गम्भीर बन्न आग्रह गरेका हुन् । नत्र, आन्दोलनमा उत्रिने कर्मचारीहरूले चेतावनी दिएका छन् । बालेनले मेयरको पदीय हैसियतमा बसेर प्रदेश र संघीय सरकारसँग समन्वय गर्नुपर्नेमा समाजिक सञ्जालमार्फत् उच्छृखंल, अवाञ्छित र उत्तेजित शब्द प्रयोग गरेर समस्यालाई झन् ठूलो बनाइरहेको विज्ञप्तिमा भनिएको छ । संघका अध्यक्ष नारायणप्रसाद शर्माद्वारा हस्ताक्षरित पत्रमा भनिएको छ, महानगरको नेतृत्व जिम्मेवार एवम् गम्भीर भइ समस्या समाधानको लागि सम्बन्धित निकायसँग समन्वयात्मक तवरले निकास खोज्नुपर्नेमा यस्ता गतिविधिले समस्या हल गर्नतर्फ होइन, दम्भ प्रदर्शनतर्फ अग्रसर देखिन्छ ।