काठमाडौं । नेपाल राष्ट्र बैंकबाट गभर्नर महाप्रसाद अधिकारी बिदा भएका छन्। वि।सं २०७६ साल चैत २४ गते ५ वर्षे कार्यकालका लागि गभर्नर बनेका अधिकारी आफ्नो कार्यकाल सकेर शुक्रबार बिदा भएका हुन्। नेपाल राष्ट्र बैंकमा आयोजित गभर्नर अधिकारीको बिदाइ कार्यक्रममा उनले आफ्नो कार्यकाललाई सन्तुष्टिका वर्षहरू मानेको बताए । उनले भने, ‘जस्तोसुकै असहज परिस्थिति भए पनि त्यससम्बन्धी चुनौती सामना गर्न यहाँहरूको सहयोग र सद्भाव, बल र आँट मिलेकाले विगतका ५ वर्ष मेरा लागि सन्तुष्टिका वर्षहरू रहे । राष्ट्र बैंकको इतिहासमा महत्त्वपूर्ण इँटाहरू थपिएको महसुस गरेको छु । मूल्यांकन यहाँहरूले गर्ने हो । आफ्नो कार्यकालको दोस्रो वर्ष पुग्दै गर्दा नेपाल राष्ट्र बैंक नेतृत्वमाथि प्रहार भई केन्द्रीय बैंकको स्वायत्ततामाथि ठाडो हस्तक्षेप भएको स्मरण गरे । केन्द्रीय बैंक सञ्चालनको विश्वव्यापी मान्यता तथा मर्मअनुरूप यस बैंकको स्वायत्ततालाई अक्षुण्ण राखिदिने सर्वोच्च अदालतलगायतलाई कृतज्ञता समेत उनले व्यक्त गरे ।