काठमाडौं । पशुपतिप्रसाद २ भष्मे डनमा मित बाको भूमिकामा अभियन गरेका कलाकार प्रकाश घिमिरे पोखरा नदीपुरका स्थायी बासिन्दा हुन् । उनी फिल्म र नाटकमा अभिनयको प्रस्ताव आउँदामात्रै घर छोड्छन् । अरुबेला पोखरामै बस्छन् । नदीपुरमै उनको गाईगोठ छ । गोठमा दुहुनु गाई टुट्दैन ।
दूध खान पालिएको गाईलाई घाँस काट्नु उनको दैनिकी हो । शुक्रबार बिहान ९ः३० बजेतिर उनी आफ्ना साथी प्रेम शेरचनको घर नजिकै भीरमा घाँस काट्न पुगे । ब्लकको गारोमा भर परेर भीरको बाबियो काट्न तलतिर नुघे । नाजुक गारो भत्कियो । उनी ५० मिटर तल पुगेर बजारिए । तत्कालै उद्धार गरी पारिपट्टीको मणिपाल शिक्षण अस्पतालमा पुर्‍याउँदा उनी अचेत थिए । रक्तचापमा उतारचढाव थियो । साँझसम्म उनको स्वास्थ्यावस्थामा सुधार आएको कलाकार तथा निर्देशक अनुप बरालले बताए । उनका अनुसार घिमिरेको टाउको, छाती, मेरुदण्डमा चोट लागेको छ । घिमिरेलाई हाल अस्पतालको आईसीयूमा राखेर उपचार भइरहेको छ । ‘अहिले होस आएको छ, रक्तचाप पनि स्थिर छ,’ अस्पतालबाट बरालले भने, ‘चिकित्सकसँग दोहोरो कुराकानी भएको छ । अहिले अवस्था सुधारोन्मुख छ ।’ पोखरामा नाटकबाट आफ्नो अभिनय यात्रा सुरु गरेका उनी पछिल्लो समय फिल्ममा चल्तीका चरित्र अभिनेता हुन् । ‘दलन’ टेलिशृंखलामा ‘धम्मरे दमाई’ पात्रबाट चिनिएका उनले टलकजंग भर्सेस टुल्के, पशुपतिप्रसाद, साइँलीलगायत तीन दर्जनभन्दा बढी चलचित्रमा अभिनय गरेका छन् । उनले पोखराकै कन्या माविमा ३७ वर्ष पढाएर ०७५ मा अवकाश प्राप्त गरेका थिए । ६२ वर्षीय घिमिरे सूर्योदय युवा क्लबको संस्थापक अध्यक्ष, पोखरेली युवा सांस्कृतिक परिवारको पूर्वअध्यक्ष हुन् ।