हेटौंडा । बागमती प्रदेशका मुख्यमन्त्री बहादुर सिंह लामाले दिएको राजीनामा आज प्रदेश प्रमुखको कार्यालयमा दर्ता गरिँदैछ । लामाले आइतबार साँझ पत्रकार सम्मेलन गरेर मुख्यमन्त्री पदबाट राजीनामा दिएको घोषणा गरे पनि प्रदेश प्रमुखको कार्यालय बन्द भइसकेकाले राजीनामा पत्र बुझाउन पाएका थिएनन् । उनले आफ्नो सचिवालयलाई राजीनामा पत्र जिम्मा लगाएर काठमाडौं हिँडेका थिए । आफ्नै पार्टी नेपाली कांग्रेसका बहुमत सांसदको अविश्वास प्रस्तावलाई असफल बनाउन नसकेपछि र संदीय दलको नेताको निर्वाचनमा इन्द्रबहादुर बानियाँसँग हारेपछि नैतिक संकटमा परेका लामाले आइतबार राजीनामा दिएका थिए । राजीनामा दिनुअघि उनले तीन जना मन्त्री नियुक्त समेत गरेका थिए । मन्त्रीहरु गोविन्द लम्साल, माया श्रेष्ठ र गीता गुरूङको सपथग्रहण १५ साउनको दिन दिउँसो एक बजे तय भएको थियो । तर प्रदेश प्रमुख दीपकप्रसाद देवकोटा सपथग्रहणको दिन बिहानै ५ बजे उपचारका लागि भन्दै काठमाडौं गएपछि सपथ ग्रहण कार्यक्रम रोकिएको थियो । धापासीस्थित ग्राण्डी अस्पतालमा मूत्रप्रणालीको उपचार गराएर डिस्चार्ज भएपछि देवकोटा ललितपुरको भैंसेपाटीस्थित सरकारी निवासमा बसेका छन् । उनी आज सोमबार हेटौंडा फर्किने तयारीमा रहेको उनको सचिवालयले जनाएको छ । बहादुरसिंह लामाको राजीनामा स्वीकृत गरेपछि प्रदेश प्रमुख देवकोटाले नयाँ सरकार गठनका लागि दाबी पेश गर्न आह्वान गर्नेछन् । त्यसपछि सरकारको नेतृत्व गर्नेले ५६ जना बहुमत सांसदको हस्ताक्षरसहितको दाबी पेश गर्नुपर्ने छ । दाबी पेश सदर भएपछि मुख्यमन्त्रीको नियुक्ती र पद तथा गोपनीयताको सपथ हुनेछ । १४ साउनमा कांग्रेस संसदीय दलको नेता चयनका लागि भएको निर्वाचनमा इन्द्रबहादुर बानियाँ विजयी भएकाले उनले नै मुख्यमन्त्रीमा दाबी पेस गर्ने तयारी गरेका छन् । बानियाँले सत्ता साझेदार दल नेकपा एमालेको समर्थनमा मुख्यमन्त्रीको लागि दाबी पेश गर्ने तयारी गरिरहेको उनी निकट एक नेताले बताए ।