काठमाडौं । नेपाल प्रहरीका ४६ जना प्रहरी निरीक्षक (इन्सपेक्टर)लाई प्रहरी नायव उपरीक्षक (डिएसपी)मा बढुवाका लागि सिफारिस गरिएको छ । आइतबार बसेको बढुवा समितिको बैठकले डिएसपीमा बढुवा गर्न सिफारिस गरेको हो ।
समितिले चिरन्जिवी दाहाललाई एक नम्बरमा बढुवा सिफारिस गरेको छ । रेशम बोहरा, भोलाकुमार भट्ट, सुरज कार्की, सुवास बुढाथोकी, सन्तोष रोक्का र रबिन बिष्ट सहित ४६ जनालाई बढुवा सिफारिस गरिएको छ । गृह मन्त्रालयमा बसेको बढुवा समितिको बैठकले जनपद प्रहरी समूहतर्फका इन्सपेक्टरलाई डिएसपीमा बढुवा सिफारिस गरेको हो । गृहसचिव अध्यक्ष हुने बढुवा समितिमा गृह मन्त्रालयका सह–सचिव सदस्य र प्रहरी अतिरिक्त महानिरीक्षक (एआईजी) सदस्य–सचिव रहन्छन् ।