सुदर्शन थापाको निर्देशनमा तयार हुन लागेको फिल्म ‘रावायण’मा नयाँ ट्विस्ट आएको छ । गतबर्ष नै घोषणा भएर पनि निर्माण हुन नसकेको यो फिल्ममा अब भने कलाकारहरूको लाइनअपमा नयाँ ट्विस्ट आएको हो । यो फिल्मलाई अब नायिका पूजा शर्मा र निर्देशक सुदर्शन थापाले मिलेर बनाउने भएका छन् । मेरो फिल्मलाई विशेष स्रोतले दिएको जानकारी अनुसार, चैत्रको दोस्रो साताबाट छायांकन गर्ने गरि फिल्मको प्रि–प्रोडक्शनको तयारी धमाधम चलिरहेको छ । यो फिल्ममा अब नायक पल शाहको प्रवेश भएको छ । केही साता अगाडि पोखरा पुगेर निर्देशक तथा निर्माता सुदर्शन थापा, नायिका तथा निर्मात्री पूजा शर्माले पलसँग यो विषयमा कुरा गरेका थिए । यसपछि, पल फिल्ममा काम गर्न तयार भएको वुझिएको छ । फिल्म ‘पूजार सार्की’को छायांकन सकेपछि पलले यो फिल्मको छायांकन सुरु गर्ने मेरो फिल्मलाई स्रोतले बतायो । फिल्ममा पल शाहको दोहोरो भूमिका हुनेछ । निर्माणपक्षले फिल्मको कथावस्तुमा भने केही हेरफेर गरेको छ । फिल्म भित्र पल सकारात्मक र नकारात्मक भूमिकामा देखिदैछन् । फिल्म ‘रावायण’सँगै फेरि सुदर्शन, पूजा र पलको टिम एक भएको छ । यी तीन जनाले फिल्म ‘म यस्तो गीत गाउँछु र म यस्तो गीत गाउँछु २’मा सहकार्य गरेका थिए । यसपछि, दर्शकले पल र पूजाको जोडीलाई निक्कै रुचाएका थिए । तर, बीचमा यी तीन जनाको सहकार्य टुटेको थियो । तर, अब भने फेरि नेपाली फिल्मका दर्शकले निकै नै मन पराएको यो टिम एक भएको हो । विशेष श्रोतका अनुसार, सुदर्शन, पूजा र पलले अब निरन्तर रुपमा सहकार्यलाई अगाडि बढाउने तयारी समेत गरेका छन् । आज नायक पल शाहको जन्मदिन समेत हो । नायिका पूजा शर्माले मध्यरातमै पललाई शुभकामना दिएकी थिइन् । यसबाट भने पल र पूजाबीच सहकार्यको वातावरण बनेको वुझिएको थियो । फिल्म ‘रावायण’ सुदर्शनको पनि एउटा ड्रिम प्रोजेक्ट हो । आफ्नो पुरानो टिमलाई फेरि जोडेर सुदर्शनले काम अगाडि बढाएका छन् । नेपाली फिल्म क्षेत्रमा लभ स्टोरी फिल्म बनाउन माहिर मानिएका सुदर्शनले ‘रावायण’लाई उच्च क्यानभासमा खिच्न लागेको वुझिएको छ । आगामी बर्ष बक्स अफिसका लागि ‘रावायण’ विशेष हुने अड्कल लगाउन सकिन्छ ।