रौतहटको गुजरा नगरपालिकाकी उपमेयरमाथि हातपात भएको छ । साथै गाडीमा तोडफोड भएको छ । उपमेयर रत्ना लामाले आफूमाथि सोमबार नगरपालिकाको कार्यालय परिसरमै हातपात भएको बताइन् ।

उनले मेयर सन्तलाल चौधरीको इशारामा वडा नम्बर १ का स्थानीय महिलाहरूको समूहले कार्यालय परिसरमै आएर आफूमाथि कुटपिट तथा दुर्व्यवहार गरेको आरोप लगाइन् ।
लामाका अनुसार त्यसअघि मेयरका भाइ–भतिजाले आफू सवार प्रदेश २–०३–००१ झ ००२१ नम्बरको गाडी गुजरा–१ र ९ को सिमानामा पर्ने लमाहा खोलामा रोकेर तोडफोड गरेका थिए । त्यसपछि नगरपालिका पुगेपछि कार्यालय परिसरमै हातपात भएको उनको भनाइ छ ।

उपमेयर लामाले वडा नम्बर १ मा सहकारीमार्फत भइरहेको मलखाद्य वितरणमा नयाँ डिलर दर्ता गराउन मेयर पक्षले दबाब दिएको तर आफूले कानुनअनुसार मात्र काम गर्न निर्देशन दिएको बताइन् । यही विषयलाई लिएर आफूमाथि आक्रमण र गाडी तोडफोड गरिएको उनको दाबी छ ।

घटनाबारे अनुसन्धान र कारबाहीको माग गर्दै आज इलाका प्रहरी कार्यालय चन्द्रनिगाहपुरमा लिखित उजुरी दिने उनले जानकारी दिइन् ।

गुजरा नगर कार्यपालिका सदस्य विजय साह बानियाँले घटनामा मेयर पक्षका स्थानीय र आफन्तको संलग्नता रहेको आरोप लगाउँदै दोषीमाथि कारबाही हुनुपर्ने बताए ।

यता, मेयर सन्तलाल प्रसाद चौधरीले भने घटनामा आफ्नो संलग्नता नरहेको दाबी गरेका छन् । किसानले समयमा मल नपाउँदा आक्रोश व्यक्त गरेको क्रममा घटना भएको र उपमेयर संयमित नहुँदा अवस्था बिग्रिएको उनको भनाइ छ ।

इलाका प्रहरी कार्यालय चन्द्रनिगाहपुरकी डीएसपी रुपा लाबुङले घटनाबारे मौखिक जानकारी आएको र अनुसन्धान भइरहेको बताइन् ।

२०७९ को स्थानीय तह निर्वाचनमा मेयर चौधरी जसपाबाट दोस्रो कार्यकालका लागि निर्वाचित भएका थिए भने उपमेयर लामा नेपाली कांग्रेसबाट निर्वाचित भएकी हुन् ।