एटलान्टा । फिफा विश्वकप २०२६ को फाइनलअघि स्पेनका युवा स्टार लामिन यामालको फिटनेसलाई लिएर चिन्ता बढेको छ। बिहीबारको नियमित प्रशिक्षणमा उनी पूर्ण रूपमा सहभागी नभएपछि आइतबार अर्जेन्टिनाविरुद्ध हुने फाइनल खेलमा उनको उपलब्धताबारे चर्चा सुरु भएको हो।

१९ वर्षीय यामाल फ्रान्सविरुद्धको सेमिफाइनलपछि मैदानबाट लडखडाउँदै बाहिरिएका थिए। बिहीबार उनले हल्का स्ट्रेचिङ अभ्यास मात्रै गरे भने टोलीको पासिङ ड्रिलमा सहभागी भएनन्। प्रशिक्षणका क्रममा उनको बायाँ तिघ्रामा पट्टी बाँधिएको देखिएको थियो।

स्पेनका प्रशिक्षकहरूले भने यो निर्णय ‘वर्कलोड व्यवस्थापन’ का लागि गरिएको बताउँदै यामाल फाइनलका लागि उपलब्ध हुने विश्वास व्यक्त गरेका छन्। यद्यपि, उनको चोटको वास्तविक अवस्था सार्वजनिक गरिएको छैन।

विश्वकपअघि यामाल बायाँ ह्यामस्ट्रिङको चोटबाट निको हुने क्रममा थिए। यस्तो चोट पुनः बल्झिन सक्ने भएकाले टोली व्यवस्थापनले उनको अवस्थामाथि विशेष निगरानी राखिरहेको छ।

फ्रान्सविरुद्धको सेमिफाइनलको अन्त्यतिर कप्तान किलियन एम्बाप्पेलाई रोक्ने क्रममा यामालले बायाँ खुट्टा समातेका थिए। त्यसपछि उनले खेल जारी राखे पनि खेल सकिएपछि लडखडाउँदै मैदानबाट बाहिरिएको दृश्यले चोट पुनः बल्झिएको हुन सक्ने अनुमान गरिएको छ।

यामालले यस विश्वकपमा सात खेल खेल्दै एक गोल गरेका छन् भने पाँच गोलका अवसर सिर्जना गरेका छन्। उनी टोलीमा रहँदा स्पेन पछिल्ला १४ खेलदेखि अपराजित छ, त्यसैले फाइनलअघि उनको फिटनेस स्पेनका लागि निकै महत्त्वपूर्ण मानिएको छ।

टोली व्यवस्थापनले यामाल फाइनल खेल्न सक्षम हुने दाबी गरे पनि अन्तिम निर्णय खेलअघि हुने फिटनेस परीक्षणपछि मात्रै हुने अपेक्षा गरिएको छ।