काठमाडौं । चीनका राष्ट्रपति सी चिनफिङ दुई दिने राजकीय भ्रमणका लागि आज नेपाल आउँदैछन् । उनीसँगै चार जना महत्वपूर्ण नेताहरु पनि काठमाडौं आउँदैछन् । उनीहरु सबै उपप्रधानमन्त्री सरहकै हैसियत भएका नेताहरु हुन् ।
राष्ट्रपति सीसँगै आउने नेतामा डिङ्ग सुईसियाङ हुन् । उनी चिनियाँ कम्युनिस्ट पार्टीको पोलिटिकल ब्युरो सदस्य हुन् । त्यसका साथै सुईसियाङ चिनियाँ कम्युनिस्ट पार्टीको केन्द्रिय कार्यालयको महानिर्देशक हुन् ।
त्यस्तै अर्का नेता याङ जिची पनि भ्रमणमा दलमा सदस्य छन् । उनी चीनको पुर्व विदेशमन्त्री र स्टेट काउन्सिलर रहिसकेका नेता हुन् । हाल उनि सिपीसीको महासचिव समेत रहेका चिनियाँ राष्ट्रपति सी मातहतको विदेश मामिला आयोगको निर्देशक छन् । त्यसका साथै उनि पार्टीको पोलिटिकल ब्युरोको सदस्य समेत हुन् ।
भ्रमण दलमा अर्का नेता हुन् विदेशमन्त्री वाङ यी । उनी चीनको स्टेट काउन्सिलर समेत हुन् । वाङ नेपालस‍ँग परिचित नेता समेत हुन् । उनी पनि उपप्रधानमन्त्रीसरहकै चिनियाँ नेता हुन् । गत महिना मात्र उनले नेपालको भ्रमण गरेका थिए ।
सीको टोलीमा ही लिफेङ्ग समेत रहेका छन् । राष्ट्रिय विकास र सुधार आयोगसम्बन्धी क्षेत्र हेर्ने मन्त्री ही चिनियाँ राष्ट्रपति सीका अति विश्वासिला नेता हुन् । उनले यसअघि फुझोओ, तेन्जिन र सेयामिनमा पार्टी प्रमुख भएर काम गरेका थिए । त्यसका साथै चिनियाँ राष्ट्रपति सी फुजियान प्रान्तमा कार्यरत हुँदा हिले निकट सहयोगी भएर मातहतमा काम गरेका थिए । टोलीमा चिनियाँ कम्युनिस्ट पार्टीका विदेश विभाग प्रमुख सोङ्ग ताओ समेत नेपाल आउँदैछन् । उनी चीनको बहालवाला मन्त्री समेत हुन् । गत महिना मात्र ताओ नेपाल कम्युनिस्ट पार्टीको निमन्त्रणामा नेपाल भ्रमणको क्रममा काठमाडौं आएका थिए ।