नायिका स्वस्तिमा खड्काले नयाँ फिल्म साइन गरेकी छिन् । उनले, दीपेन्द्र के खनालको निर्देशनमा तयार हुन लागेको फिल्म ‘हरि बहादुरको जुत्ता’मा काम गर्ने पक्का भएको हो । फिल्मको निर्माण टिम र स्वस्तिमाबिच कागजी संझौता भएको छ । स्वस्तिमा फिल्म ‘बेहुली फ्रम मेघौली’ रिलिजपछि ‘बसन्त’ नामक प्रोजेक्टमा व्यस्त छिन् । यो फिल्ममा कलाकारद्वय हरिवंश आचार्य र प्रकाश सपुत फाइनल भइसकेका छन् । प्रकाशसँग स्वस्तिमाले फिल्म ‘बसन्त’मा पनि सहकार्य गर्दैछिन् । यो फिल्मलाई सरोज ओलीले निर्माण गर्दैछन् । हरिवंशको नै कथा रहेको यो फिल्मको छायांकन चाँडै सुरु गरिने निर्माणपक्षले बताएको छ । स्वस्तिमाको प्रवेशसँगै कलाकारको लाइनअप अझै बलियो बनेको छ ।