काठमाडौं । ब्राजिलका स्टार फरवार्ड नेयमारले जारी विश्वकप फुटबल प्रतियोगिताको दोस्रो खेल पनि गुमाउने भएका छन्। ब्राजिलियन फुटबल महासंघका अनुसार पिँडुलाको चोट पूर्ण रूपमा निको नभएकाले उनी समूह ‘सी’ अन्तर्गत हाइटीविरुद्धको खेलका लागि टोलीसँग फिलाडेल्फिया जाने छैनन्।

महासंघले नेयमार न्यु जर्सीमै बसेर उपचार र पुनर्स्थापनाको अन्तिम चरणमा केन्द्रित हुने जनाएको छ। ३४ वर्षीय नेयमारले हाल टोलीको प्रशिक्षण शिविरमा व्यक्तिगत अभ्यास गरिरहेका छन्।

ब्राजिलका सर्वाधिक गोलकर्ता नेयमारले राष्ट्रिय टोलीका लागि ७९ गोल गरेका छन्। उनले महान् फुटबलर पेलेको ७७ गोलको कीर्तिमानलाई उछिनेका हुन्।

दायाँ पिँडुलाको चोट बोकेर राष्ट्रिय टोलीमा सामेल भएका नेयमार गत मे १७ मा सान्तोसबाट खेल्ने क्रममा घाइते भएका थिए। उनी हालसम्म टोलीसँग पूर्ण प्रशिक्षणमा सहभागी हुन सकेका छैनन्।

पाँच पटकको विश्वकप विजेता ब्राजिलले प्रतियोगिताको पहिलो खेलमा मोरक्कोसँग १–१ को बराबरी खेलेको थियो। चौथो विश्वकप खेल्ने लक्ष्यमा रहेका नेयमारको टोलीमा समावेशीकरणलाई लिएर ब्राजिलमा व्यापक चर्चा समेत भएको थियो।