काठमाडौं । भारतीय बजारबाट लुकाई छिपाई नेपाल प्रवेश गराउने र राजस्व छल्ने सुर्तीजन्य बस्तुहरुको निगरानी बढाउने क्रम देखिएको छ । यस्ता काममा राजस्वका कर्मचारी भन्दा प्रहरी नै अगाडि छन् । मोलतोल नमिल्दासम्म लागू पदार्थ जन्य बस्तुहरुको कारोबार गर्न सहज छैन । जब भन्सार, प्रहरी र राजस्वको मिल्ती हुन्छ, त्यसपछि व्यापारीहरुको धन्दा चम्कन्छ । जहाँ मिल्दैन त्यहाँ प्रहार हुन्छ । प्रहरीले काठमाडौंको कोटेश्वर र गौरीघाटस्थित गुट्खा गोदाममा छापा मारेको छ ।

महानगरीय अपराध महाशाखाबाट खटिएको प्रहरी टोलीले गोदाममा छापा मारेर भन्सार छलीको गुट्खा बरामद गरेको हो । करिब ८ लाख मूल्य बराबरको सुर्तिजन्य पान–पराग, राजनिवास, तुलसी, रजनिगन्धा र गुट्खा नियन्त्रणमा लिइएको महाशाखाका एसएसपी चन्द्र कुवेर खापुङले बताएका छन् । भन्सार छलेर सो सामग्री काठमाडौं ल्याउने दुईजनालाई प्रहरीले पक्राउ गरेको छ । पक्राउ पर्नेमा महोत्तरी घर भएका मदन शाह रौनियार र श्रवण कुमार सिंह छन् ।

कोटेश्वरमा रहेको रौनियारको गोदाम र गौरीघाटस्थित सिंहको गोदामबाट दाँत सफा गर्न प्रयोग गरिने गुल, भारतीय कम्पनीको चुरोट र रेडबुल पनि प्रहरीले बरामद गरेको छ । वीरगञ्ज लगायतका नाका छलेर सो सामान काठमाडौं ल्याएको उनीहरुले प्रहरीलाई बताएका छन् । सामानसहित उनीहरुलाई कारवाहीका लागि राजस्व अनुसन्धान विभागमा पठाइने एसएसपी खापुङले बताएका छन् । बीरगन्ज देखि काठमाण्डौसम्म आउदा ती सामानको चेक जाँच नहुनु लाइन मिल्नु हो ।