काठमाडौं । सातै प्रदेशका मुख्यमन्त्री र प्रदेश प्रमुखलाई बनाएका आवास हस्तान्तरण गरिएको छ। आइतबार ललितपुरको भैंसेपाटीमा बनेको १४ वटा ब्लक प्रधानमन्त्रीसहित अन्य १० जना मन्त्रीहरूको उपस्थितिमा हस्तान्तरण गरिएको हो। करिब ८५ करोड रुपैयाँ लगानी सो आवास भवनको उद्घाटनका लागि आइतबार भैंसेपाटीमा मन्त्रीहरूको लर्को नै लागेको थियो। शहरी विकास मन्त्रालयका अनुसार २७ रोपनी १२ आनामा भवन निर्माण गरिएको छ। हस्तान्तरण कार्यक्रमको सभाध्यक्षता मन्त्री सीता गुरुङले गरेकी थिइन्। प्रदेश प्रमुख तथा मुख्यमन्त्रीको अवास तथा सम्पर्क केन्द्रको रूपमा आयोजना निर्माण गरिएको हो। कार्यक्रममा उर्जा जलस्रोत तथा सिंचाइ मन्त्री शक्ति बस्नेत, कानुन न्याय तथा संसदीय मामिला मन्त्री धनराज गुरूङ, सञ्चार तथा सुचना प्रविधी मन्त्री रेखा शर्मा, वन तथा वातावरण मन्त्री वीरेन्द्र महतो, उद्योग वाणिज्य तथा आपुर्ती मन्त्री रमेश रिजाल, परराष्ट्रमन्त्री नारायणप्रकाश साउद, संघीय मामिला तथा सामान्य प्रशासन मन्त्री अनिता देवी शाह, भौतिक पूर्वधार तथा यातायात मन्त्री प्रकाश ज्वाला र शिक्षामन्त्री अशोक राई कार्यक्रममा सहभागी थिए। मन्त्रीसँगै सरकारका मुख्यसचिव बैकुण्ठ अर्यालसहित मन्त्रालयका सचिवहरू समेत कार्यक्रममा उपस्थित थिए।