अमेरिकामा एकै दिनमा झण्डै एक हजार जना अवैध आप्रवासी समातिएका छन् । अमेरिकी राष्ट्रपति डोनल्ड ट्रम्पले सामूहिक रूपमा अवैध आप्रवासी निकाल्ने घोषण गरेयता देशभरमा त्यस्ता आप्रवासीको खोजी तीव्र बनेको छ ।

यसैबिच आइतबार एकै दिनमा यो अभियानमा ९५६ जना समातिएको त्यहाँको अध्यागमन तथा भन्सार विभाग आइसले बताएको हो । पक्राउ गर्ने शक्ति विस्तार गरिएका केही संघीय एजेन्सीहरू सिकागो, नेवार्क र मियामी समेतका कयौँ सहरमा छापा मार्न सक्रिय छन् ।

अमेरिकामा अवैध रूपमा बसिरहेका आप्रवासीलाई निकाल्ने वाचा ट्रम्पको चुनावी अभियानको मुख्य मुद्दा थियो । ट्रम्पका पूर्ववर्ति जो बाइडेनले दिनमा औसतमा ३११ जनालाई निर्वासित गरेको र यीमध्ये अधिकांश अपराधी भएको आइसको भनाइ थियो । जनवरी २० मा कार्यभार सम्हालेयता ट्रम्पले अमेरिकी अध्यागमन प्रणालीमा कायापलट गर्न २१ वटा कार्यकारी आदेशमा हस्ताक्षर गरेका छन् । ट्रम्पका सीमा जार टम होम्यान निर्वासनको काम र प्रक्रिया हेर्न सिकागोमा छन् ।