काठमाडौं । काठमाडौं महानगरपालिकाका प्रमुख प्रशासकीय अधिकृत सरोज गुरागाईंले खर्च निकासा गरेका छन् । खर्च निकासा गरेसँगै महानगरमा करिब चार महिनादेखि रोकिएको तलबसुविधा भुक्तानी हुने भएको छ । महानगरका प्रवक्ता ध्रुवकुमार काफ्लेका अनुसार गुरागाईंले शुक्रबार कार्यालय समयमै कमलादीस्थित कार्यकक्षमा पुगेर खर्च निकासा फाइलमा हस्ताक्षर गरेका हुन् । गुरागाईंले गर्नुपर्ने निकासा गर्नुभएको छ, काफ्लेले भने, भुक्तानीका कारण रोकिएका सबै काम अब अघि बढ्छ । गुरागाईंले खर्च निकासा गरेसँगै कर्मचारीको खातामा तलब पनि आगामी सोमबारसम्म जाने काफ्लेले जानकारी दिए । आइतबार पनि सार्वजनिक बिदा भएकाले महानगरका कर्मचारीको ६ महिनादेखि रोकिएको तलब सोमबारमात्र खातामा जाने भएको हो । काठमाडौं टावरको विषयलाई लिएर मेयर बालेन्द्र शाहले प्रमुख प्रशासकीय अधिकृत गुरागाईंलाई काम गर्न रोकेका थिए । टावर निर्माण प्रक्रिया अनियमित रूपमा अघि बढाउन दिएर भ्रष्टाचार गरेको आरोप शाहले गुरागाईंमाथि लगाएर उनको कार्यकक्षमा ताला ठोकिदिएका थिए । तर, तीन महिना १४ दिनपछि बिहीबार वडाध्यक्ष र कर्मचारीहरूको जोडबलमा गुरागाईं कार्यकक्ष छिरेका थिए । उनले बिहीबार कार्यकक्षमा छिरेर हाजिर गरेपछि शुक्रबार खर्च निकासा गरिदिएका हुन् । बिहीबार उपमेयर सुनिता डङ्गोल, कार्यपालिका सदस्यहरू, वडाध्यक्ष र कर्मचारीले समेत साथ दिएर गुरागाईंलाई काठमाडौं महानगरपालिकाको कार्यालयमा प्रवेश गराएका थिए । तर, उता बालेनका स्वकीय सचिव भूपदेव शाहले भने भ्रष्टाचारमा मुछिएका व्यक्तिलाई कार्यालयमा छिराएको भन्दै उनी दोषी देखिए यसमा सङ्लग्न सबै जेल जान तयार हुनुपर्ने चेतावनी दिएका थिए ।