एलिना भन्छिन्– विनोद अधिकारीले जाँड खाएर मुख छाडे, अधिकारी भन्छन्– कार्यक्रम सफल भयो कार्यक्रम नसकी आफैं टिकट काटेर अमेरिकाबाट फर्किन् एलिना

काठमाडौं । फ्लाइ नेपा ट्राभल्सले आयोजना गरेको अब सुन्छ अमेरिका कार्यक्रम अन्तर्गत अमेरिका भ्रमणमा गएकी गायिका एलिना चौहान चरम असन्तुष्ट बनेर नेपाल फिरेकी छन् । अमेरिका टुरका लागि गएकी एलिनाको साढे दुई महिना लामो अमेरिका बसाई त्यति सुखद भएन ।

उनले भ्रमणका क्रममा आफू र सहकर्मी कलाकारमाथि नोकरजस्तो व्यवहार भएको बताएकी छन् । सामाजिक सञ्जालमा एलिनाले लेखेकी थिइन्, कलाकारलाई सम्मान होइन, नोकरझैँ व्यवहार गरियो । कसैले कैदीझैँ महसुस गर्‍यो, कसैले अपमान सहनु पर्‍यो । आफूलाई आयोजकले निकै टर्चर दिएको एलिनाले दुखेसो छ ।

उनले भनिन्, मलाई मात्रै होइन विनोद अधिकारीले धेरै कलाकारलाई टर्चर दिनुभएको रहेछ । खै किन हो उहाँहरु अन्य कलाकार बोल्नुभएन,म चाहिँ बोलेँ । कति धेरै कमेडियनहरुलाई पनि टर्चर दिनुभएको रहेछ ।

विनोद अधिकारी फ्लाइ नेपा ट्राभल्सका संचालक हुन् । अधिकारीले दिएको टर्चरकै कारण आफूले कार्यक्रम बीचमै छाडेर आएको एलिनाले बताइन् । धेरै नै मानसिक टर्चर दिएपछि बाँकी दुईवटा कार्यक्रम नगरी नेपाल फर्किएँ । आफैंले टिकट काटेर आएकी हुँ ।

कार्यक्रमहरुमा दर्शकबाट महँगो पैसा असुलेर अधिकारीले आफूहरुलाई २० प्रतिशत मात्रै दिने गरेको पनि एलिनाको आरोप छ । ८० प्रतिशत अधिकारीले खाने गरेको प्रमाण आफूले फेला पारेको उनले बताइन् ।

विनोद अधिकारीले जाँड खाएर बोल्ने, मुख छाड्ने गर्नुभयो । होटेलमा राख्छु भनेर लग्नुभएको थियो, तर साढे दुई महिनामा क–कसको घरमा राख्नुभयो, भात खुवाउनुभयो, मैले नै बिर्सिएँ । १५ दिन पनि होटेलमा राख्नुभएन, एलिनाले दुखेसो पोखिन्, मैले एउटा कलाकारको नाताले आफूले निर्वाह गर्नुपर्ने सबै जिम्मेवारी पूरा गरेँ । तर, उहाँ विनोद अधिकारी का कारणले म चार–पाँचपटक नै रोएकी छु । मलाई रुवाएको छ । मेरो नीजि जीवनमा घुसेर पनि यो यस्तै हो भनेर भन्नुभयो । मलाई त्यो मन परेन ।

आफू नेपाली भाषी रहेका धेरै मुलुकमा पुगेको, तर अधिकारीको जस्तो तुच्छ र घटिया व्यवहारको सामना गर्नु नपरेको एलिनाले बताइन् । अधिकारीविरुद्ध अमेरिकामै कानुनी उपचारमा जानेबारे सोचे पनि समय लाग्ने भएकाले नेपाल फर्किएको उनको भनाइ छ । अधिकारीले अमेरिकामा ब्लक गर्दिन्छु भनेर धम्की समेत दिएको पनि एलिनाले बताइन् ।

एलिनासँगै अमेरिका पुगेकी गायिका कला लम्साल पनि बीचमै फर्किएकी थिइन् । आफू विरामी भएपछि उपचार गराउनुपर्ने ठाउँमा आयोजकले सामान्य मानवीय प्रवृत्ति समेत नदेखाएको भन्दै लम्सालले विरोध जनाएकी छिन् । एक अन्तरवार्तामा उनले एलिना र प्रताप दासले पनि आफूलाई अप्ठेरोमा साथ नदेखेको गुनासो गरेकी छन् ।

फ्लाइ नेपा ट्राभल्सका संयोजक तथा परिकल्पनाकार अधिकारीले एक विज्ञप्ति जारी गर्दै कार्यक्रम सफलतापूर्वक सम्पन्न भएको बताएका छन् । उनले विज्ञाप्तिमा लेखेका छन्, कलाकारसँग गरेको शर्त तथा बाचा बमोजिमको सम्पूर्ण जिम्मेवारी पूरा गरेको छु । साथै आगामी दिनमा पनि नेपाल र नेपालीलाई जोड्ने कार्यक्रमका लागि मन, वचन र कर्मले लागिपर्ने पनि बताएका छन् ।