काठमाडौं । फिफा विश्वकप २०२६ को फाइनलमा स्पेनसँग पराजित भएपछि अर्जेन्टिनाका कप्तान लियोनल मेसी भावुक बनेका छन्। खेल सकिएलगत्तै उनी अर्जेन्टिनी समर्थकतर्फ उभिएर लामो समयसम्म आँसु झारिरहेका देखिए भने मैदान छाड्दा पनि उनको अनुहार निराशाले भरिएको थियो।

निर्धारित ९० मिनेट गोलरहित बराबरीमा सकिएको खेल अतिरिक्त समयमा पुगेको थियो। अतिरिक्त समयको दोस्रो हाफ सुरु भएको केही क्षणमै फेरान टोरेसले गरेको गोलले स्पेनलाई विश्व च्याम्पियन बनायो।

निर्णायक गोल भएपछि मेसीले टाउको झुकाउँदै दुवै हात कम्मरमा राखेर मैदानतर्फ टोलाएको दृश्य सामाजिक सञ्जालमा व्यापक रूपमा फैलिएको छ। त्यही समयमा स्पेनका युवा स्टार लामिन यामाल भने गोलकर्ता टोरेसलाई अँगाल्न दौडिएका थिए।

सन् २०२२ मा अर्जेन्टिनालाई विश्वकप जिताएका मेसी यसपटक लगातार दोस्रो विश्वकप जित्ने इतिहास रच्ने लक्ष्यमा थिए। अर्जेन्टिना सन् १९६२ पछि लगातार दुई विश्वकप जित्ने पहिलो पुरुष टोली बन्ने अभियानमा रहे पनि स्पेनले त्यो सपना अधुरै बनाइदियो।

यस विश्वकपमा मेसीले ८ गोल र ४ असिस्ट गर्दै उत्कृष्ट प्रदर्शन गरे। प्रतियोगितापछि उनको विश्वकप करियरको गोल संख्या २१ पुगेको छ। उनी तीनवटा विश्वकप फाइनलमा सुरुआती टोलीबाट खेल्ने पहिलो फुटबलरसमेत बने।

फाइनलमा भने स्पेनले मेसीलाई प्रभाव जमाउन दिएन। उनले पहिलो हाफमा केवल १५ पटक बल छोए भने पूरै खेलमा ५४ पटक मात्रै बल नियन्त्रणमा लिए। गोल गर्ने स्पष्ट अवसर पनि उनले बनाउन सकेनन्।

स्पेनका प्रशिक्षक लुइस दे ला फुएन्तेले खेलपछि स्वीकार गर्दै भने, “हाम्रो पहिलो योजना नै मेसीलाई नियन्त्रणमा राख्नु थियो।”

अर्जेन्टिनाका प्रशिक्षक लियोनेल स्कालोनीले भने हारका बाबजुद मेसीको खुलेर प्रशंसा गरे।

“म आशा गर्छु, सबैले उनलाई र उनले हासिल गरेका उपलब्धिलाई गर्वका साथ सम्झनेछन्। उनी मैदानमा उत्रिएका सबैभन्दा महान् फुटबल खेलाडी हुन्।”

खेलपछि स्पेनका आधा दर्जन खेलाडी मेसीलाई अँगाल्न र सान्त्वना दिन पुगेका थिए। पदक वितरण समारोहमा पनि स्पेनका खेलाडीहरूले अर्जेन्टिनाका खेलाडीलाई सम्मानस्वरूप ‘गार्ड अफ अनर’ दिएका थिए।

मेसीले हार स्वीकार्दै भने, “हामी दुःखी छौं, तर हामीले आफ्नो सम्पूर्ण दिल लगाएर खेलेका थियौं। स्पेन उत्कृष्ट टोली थियो। हामीले हार स्वीकार गरेका छौं, तर यसले हाम्रो यात्रालाई सानो बनाउँदैन। आफ्ना समर्थक, टोली र देशप्रति म आभारी छु।”

८० हजारभन्दा बढी दर्शक उपस्थित मेटलाइफ स्टेडियममा धेरै समर्थक मेसीले दोस्रो विश्वकप ट्रफी उचालून् भन्ने चाहन्थे। तर अन्ततः सुनौलो कन्फेटी स्पेनका खेलाडीमाथि वर्षिरहँदा मेसी झुकेका काँध र आँसुले भरिएको आँखासहित मैदानबाट बाहिरिए।