काठमाडौं । इरानका सर्वोच्च नेता मोज्तबा खामेनीको स्वास्थ्य अवस्था गम्भीर बनेपछि उनलाई अस्पताल लगिएको दाबी इजरायली सञ्चारमाध्यमहरूले गरेका छन्।

इजरायली सञ्चारमाध्यम च्यानल १४ (सी–१४) ले इरानभित्रका स्रोतलाई उद्धृत गर्दै खामेनीको अवस्था ‘अत्यन्त गम्भीर’ रहेको खबर सार्वजनिक गरेको हो। जेरुसेलम पोस्टले पनि यसअघि यस्तै दाबी सार्वजनिक गरेको थियो।

च्यानल १४ ले इरानवायर तथा राष्ट्रपति मसुद पेजेस्कियानको प्रशासनसँग निकट स्रोतहरूलाई उद्धृत गर्दै खामेनीको स्वास्थ्य अवस्था गम्भीर रहेको जनाएको छ। जेरुसेलम पोस्टले उद्धृत गरेको एक स्रोतले त उनको मृत्युको खबर चाँडै आउन सक्ने दाबीसमेत गरेको छ।

मोज्तबा खामेनीले गत फेब्रुअरी २८ मा संयुक्त राज्य अमेरिका र इजरायलको संयुक्त हवाई हमलामा आफ्ना पिता तथा तत्कालीन सर्वोच्च नेता अयातोल्लाह अली खामेनीको मृत्यु भएपछि सर्वोच्च नेताको जिम्मेवारी सम्हालेका थिए।

तर सर्वोच्च नेता बनेयता मोज्तबा सार्वजनिक कार्यक्रममा देखिएका छैनन्। उनले आफ्ना लिखित वक्तव्य तथा सन्देश अरू अधिकारीमार्फत सार्वजनिक गराउँदै आएका छन्। यसले उनको स्वास्थ्य अवस्था तथा शासन सञ्चालनमा प्रत्यक्ष भूमिकालाई लिएर विभिन्न अनुमान हुँदै आएका छन्।

रिपोर्टहरूका अनुसार अमेरिका–इजरायलको संयुक्त आक्रमणको पहिलो दिनमै मोज्तबा घाइते भएका थिए। सम्भावित रूपमा अनुहारमा लागेको चोटका कारण उनी सार्वजनिक रूपमा नदेखिएको दाबीसमेत गरिएको छ।

इरानी राष्ट्रपति मसुद पेजेस्कियानले पनि राष्ट्रिय टेलिभिजनसँगको अन्तर्वार्तामा मोज्तबा खामेनीसँग प्रत्यक्ष सम्पर्क तथा अन्तरक्रिया अहिले ‘निकै कठिन’ रहेको बताएका थिए। यस अभिव्यक्तिले उनको स्वास्थ्य अवस्थाबारे भइरहेका अनुमानलाई थप बल पुगेको छ।

यसअघि पनि अन्तर्राष्ट्रिय तथा क्षेत्रीय सञ्चारमाध्यमहरूले मोज्तबा खामेनीको शारीरिक अवस्था र शासन सञ्चालन गर्ने क्षमतामाथि प्रश्न उठाउँदै आएका छन्।

जुलाईमा साउदी समाचार संस्था अल–हदाथले एक इजरायली सुरक्षा स्रोतलाई उद्धृत गर्दै मोज्तबा ‘इरानमा नरहेको’ दाबी गरेको थियो। त्यही समयमा अमेरिकी राष्ट्रपति डोनाल्ड ट्रम्पले फक्स न्युजसँगको अन्तर्वार्तामा इरानको शीर्ष सैन्य नेतृत्व समाप्त पारिएको र मोज्तबा खामेनी ‘९० प्रतिशत समाप्त’ भएको दाबी गरेका थिए।

यद्यपि इरानी अधिकारीहरूले भने मोज्तबा खामेनीको स्वास्थ्य तथा अवस्थाबारे बाहिर आएका यस्ता दाबीहरूलाई निरन्तर खण्डन गर्दै आएका छन्।

यसकारण हाल अस्पताल भर्ना भएको तथा स्वास्थ्य अवस्था ‘अत्यन्त गम्भीर’ रहेको दाबीको स्वतन्त्र पुष्टि भइसकेको छैन।