काठमाडौं । राष्ट्रपति रामचन्द्र पौडेलले नेपालसहित जलवायु परिवर्तनबाट प्रभावित मुलुकहरूको जलवायु न्याय सुनिश्चित गर्न अन्तर्राष्ट्रिय समुदायसँग ठोस र प्रभावकारी कदम चाल्न अपिल गरेका छन् ।

सोमबार राष्ट्रका नाममा सम्बोधन गर्दै राष्ट्रपति पौडेलले विश्वव्यापी तापक्रम वृद्धिका कारण हिमाली तथा पारिस्थितिकीय रूपमा संवेदनशील क्षेत्रहरूमा जोखिम बढ्दै गएको बताएका हुन् ।

“यस विपत्तिले हाम्रो हिमाली पर्यावरणको असाधारण नाजुक अवस्था मात्र दर्शाउँदैन, अपितु निरन्तर बढ्दै गएको विश्वव्यापी तापक्रम र त्यसबाट उत्पन्न जोखिमप्रति हामीलाई पुनः गम्भीर रूपमा सचेत गराएको छ,” राष्ट्रपति पौडेलले सम्बोधनमा भने ।

उनले नेपाललगायत पारिस्थितिकीय रूपमा प्रभावित राष्ट्रहरूको आवाज सुन्न मात्र नभई उनीहरूका लागि जलवायु न्याय सुनिश्चित गर्न ठोस र प्रभावकारी कदम चाल्न अन्तर्राष्ट्रिय समुदायसँग आग्रह गरे ।

राष्ट्रपति पौडेलले नेपालले विगतमा भूकम्प, बाढी, पहिरो, महामारीलगायत विभिन्न विपत्तिको सामना गर्दै आएको स्मरण गर्दै हरेक कठिन परिस्थितिमा नेपाली जनताले असाधारण साहस, धैर्य, संयम र अदम्य दृढताका साथ सामना गर्दै आएको बताए ।

उनले पछिल्लो विपत्तिको सामना गर्न पनि राष्ट्रिय एकता, सहकार्य र सामूहिक प्रयास आवश्यक रहेकोमा जोड दिएका छन् ।