काठमाडौं । व्यवसायी दीपक भट्ट र पूर्वप्रधानन्यायाधीश चोलेन्द्रशमशेर जबरासँग सम्बन्ध जोडिएको भनिएको इनम सापकोटा प्रकरणमा प्रहरीले अनुसन्धानलाई थप विस्तार गरेको छ। काठमाडौं उपत्यका प्रहरी कार्यालय रानीपोखरीले प्रहरी उपरीक्षक (एसपी) को नेतृत्वमा सात सदस्यीय छुट्टै अनुसन्धान समिति गठन गरेको छ।

समितिमा जिल्ला प्रहरी परिसर काठमाडौंका दुई प्रहरी नायब उपरीक्षक (डीएसपी) सहित अनुसन्धानमा संलग्न अधिकृतहरूलाई समेटिएको छ। उपत्यका प्रहरी कार्यालयका प्रमुख अतिरिक्त महानिरीक्षक (एआईजी) सुशीलसिंह राठौरका अनुसार समितिले नियमित अनुसन्धानभन्दा फराकिलो दायरामा रहेर प्राविधिकसहित विभिन्न पक्षको अनुसन्धान गर्नेछ।

राठौरका अनुसार समितिले जिल्ला प्रहरी परिसर काठमाडौंलाई अनुसन्धानमा सहयोग गर्नेछ। आवश्यकताअनुसार सूचना प्रविधि (आईटी) विज्ञ र चार्टर्ड एकाउन्टेन्ट (सीए) लगायतका विज्ञसँग समन्वय गरेर पनि अनुसन्धान अघि बढाइनेछ।

प्रहरीका अनुसार पूर्वप्रधानन्यायाधीश जबरालाई नियन्त्रणमा लिएपछि उनको मोबाइल फोनमा सापकोटासँग सम्बन्धित विवरण फेला परेको थियो। पुर्पक्षका लागि कारागारमा रहेका व्यवसायी दीपक भट्टले सापकोटामार्फत जबरासँग कुराकानी गरेको विवरण फेला परेपछि प्रहरीले सापकोटामाथि निगरानी बढाएको थियो। उनी भारत जान लागेका बेला विमानस्थलबाट नियन्त्रणमा परेका थिए।

सुरुमा जिल्ला प्रहरी परिसर काठमाडौंले सापकोटामाथि अभद्र व्यवहारसम्बन्धी कसुरमा अनुसन्धान अघि बढाएको थियो। पछि थप प्रमाण भेटिएको भन्दै राष्ट्र बैंक ऐनअन्तर्गतको कसुर र सम्पत्ति शुद्धीकरणसम्बन्धी विषयमा समेत अनुसन्धान भइरहेको काठमाडौं प्रहरी प्रमुख प्रहरी वरिष्ठ उपरीक्षक (एसएसपी) दिलीप घिमिरेले बताएका छन्।

घिमिरेका अनुसार सापकोटासँग सम्बन्धित प्रमाण संकलन र सोधपुछको काम भइरहेको छ। प्रहरीको दाबीअनुसार सापकोटामार्फत जबरासँग सम्पर्क स्थापित हुने गरेको र अदालतका कामकारबाहीमा प्रभाव पार्ने प्रयास भएको हुन सक्ने आशंकामा अनुसन्धान भइरहेको छ। व्यवसायी भट्टलाई छुटाउने तथा नेपाली कांग्रेसको आधिकारिकतासम्बन्धी विवादमा शेरबहादुर देउवा पक्षलाई अनुकूल हुने गरी सर्वोच्च अदालतमा प्रभाव पार्न खोजिएको आरोपसमेत अनुसन्धानको दायरामा रहेको प्रहरीको भनाइ छ। यी आरोपहरू भने अनुसन्धानबाट पुष्टि हुन बाँकी छन्।

प्रहरीले सापकोटाले नेपाली कांग्रेसका केही नेतासँग कुराकानी गरेको विवरण फेला परेको दाबी गरेको छ। त्यस्तै, जबरासँग सम्बन्धित सम्पत्ति विदेशमा व्यवस्थापन गरिएको हुन सक्ने आशंकामा पनि सोधपुछ गरिएको बताइएको छ। दुबईमा अपार्टमेन्ट खरिद गरिएको भनिएको विषयमा सापकोटाले विदेशमा आफ्नो सम्पत्ति नरहेको जिकिर गरेका छन्।

सापकोटासँग अमेरिकी ग्रिनकार्ड र सिंगापुरमा कम्पनी रहेको भनिएको विषयमा पनि प्रहरीले सोधपुछ गरेको छ। उनले यी विषय हल्ला मात्र भएको भन्दै अस्वीकार गरेको अनुसन्धानमा संलग्न एक अधिकृतले बताएका छन्। सम्बन्धित निकायबाट कागजात मगाएर विवरणको सत्यता जाँच्ने काम भइरहेको प्रहरीको भनाइ छ।

सापकोटासँग दोहोरो पासपोर्ट रहेको हुन सक्ने आशंकामा समेत अनुसन्धान भइरहेको छ। प्रहरीले अध्यागमन विभागबाट उनको विदेश आवतजावतसम्बन्धी विवरण मगाएर अध्ययन गरेको छ। उक्त विवरणमा उनी भारत र जर्मनी गएको देखिएको प्रहरी स्रोतले जनाएको छ। जर्मनी गएपछि युरोपका अन्य देशमा पनि पुगेको सापकोटाले स्वीकार गरेको बताइएको छ। तर, अमेरिकी ग्रिनकार्ड रहेको विषय उनले स्वीकार नगरेको प्रहरीको भनाइ छ। विदेश भ्रमणको विवरणका आधारमा अर्को पासपोर्ट प्रयोग भएको थियो वा थिएन भन्ने विषय पनि अनुसन्धान भइरहेको छ।

भदौ १० गते राति जबरालाई नियन्त्रणमा लिएपछि उनको मोबाइल परीक्षण गर्दा सापकोटासँग सम्बन्धित विवरण फेला परेको प्रहरीले जनाएको छ। त्यसपछि सापकोटामाथि निगरानी बढाइएको थियो। उनलाई विमानस्थलबाट नियन्त्रणमा लिने क्रममा साथबाट १ हजार ४०० अमेरिकी डलर बरामद भएको पनि प्रहरीको दाबी छ। यही विषयलाई आधार बनाएर राष्ट्र बैंक ऐनअन्तर्गतको कसुरमा अनुसन्धान अघि बढाइएको प्रहरी स्रोतले जनाएको छ।

यस प्रकरणमा सापकोटासँग सम्पर्क देखिएका भनिएका केही पूर्वन्यायाधीश तथा जबरानिकट व्यक्तिहरूमाथि पनि अनुसन्धान भइरहेको बताइएको छ। उनीहरूको संलग्नता पुष्टि गर्ने प्रमाण भेटिएको हो वा होइन भन्ने विषय भने अनुसन्धानकै क्रममा छ।

यसैबीच, सम्पत्ति शुद्धीकरण अनुसन्धान विभागले पनि जबरानिकट भनिएका व्यक्तिहरूको घरमा छापा मारेर प्रमाण संकलन गरेको विवरण सार्वजनिक भएको छ। विभागले यस प्रकरणमा छुट्टै टोली बनाएर अनुसन्धान गरिरहेको प्रधानमन्त्रीनिकट स्रोतको दाबी छ। प्रहरीका विभिन्न युनिट र विभागले समानान्तर रूपमा अनुसन्धान अघि बढाइरहेको बताइएको छ।

प्रकरणसँग सम्बन्ध जोडिएको भनिएपछि कारागारमा रहेका व्यवसायी दीपक भट्टलाई नक्खु कारागारबाट सिन्धुपाल्चोक कारागार सारिएको छ। त्यस्तै, सापकोटा र जबरासँग सम्बन्ध रहेको तथा सुरक्षासम्बन्धी संवेदनशील सूचना चुहाएको आरोपमा सशस्त्र प्रहरीका अतिरिक्त महानिरीक्षक वंशीरााज दाहाललाई सरकारले बर्खास्त गरेको विवरण पनि सार्वजनिक भएको छ।

दाहालको म्याद थपसम्बन्धी फाइल गृह मन्त्रालयमा पुगेपछि मन्त्रालयले उनको गतिविधिबारे जाँचबुझ समिति गठन गरेको थियो। समितिले तीन दिनमै प्रतिवेदन बुझाएको र त्यसमा गैरव्यावसायिक गतिविधि देखिएको निष्कर्ष निकालिएको बताइएको छ। प्रतिवेदन बुझाएको भोलिपल्ट गृहमन्त्री सुधन गुरुङले दाहाललाई बर्खास्त गरेको विवरणमा उल्लेख छ।

प्रहरीले सापकोटामार्फत अन्य व्यक्तिसँगको सम्पर्क र सम्भावित आर्थिक कारोबारसम्बन्धी विवरण खुल्न सक्ने भन्दै अनुसन्धानलाई गम्भीर रूपमा अघि बढाएको छ। अब अनुसन्धानको मुख्य चासो सापकोटाको मोबाइल तथा डिजिटल विवरण, विदेश आवतजावत, सम्भावित आर्थिक कारोबार र सम्बन्धित व्यक्तिहरूबीचको सम्पर्कबाट के–कस्ता तथ्य स्थापित हुन्छन् भन्नेमा केन्द्रित देखिएको छ।

यद्यपि, अनुसन्धानका क्रममा उठेका आरोप र आशंकालाई पुष्टि भएको तथ्यका रूपमा लिन मिल्दैन। सम्बन्धित व्यक्तिहरूको संलग्नता तथा सम्भावित कसुरबारे अन्तिम निष्कर्ष प्रमाणको परीक्षण र कानुनी प्रक्रियापछि मात्रै निस्कनेछ।