काठमाडौँ । सिंगो पार्टी एकातिर भए पनि प्रधानमन्त्रीको एक्लो चाहनामा पास गर्न लागिएको अमेरिकी सहयोग मिलेनियम च्यालेञ्ज कर्पोरेसन (एमसीसी) विधेयक अलपत्र पर्ने भएको छ । सोबारे छलफल गर्न बोलाइएको नेकपाको सचिवालय बैठक पटक पटक स्थगित भएको छ । प्रधानमन्त्री केपी शर्मा ओलीको कार्यव्यस्ताका कारण मंगलबार दिउँसो ४ बजेलाई बोलाइएको सचिवालय बैठक स्थगित गरिएको हो । अध्ययन कार्यदलको सिफारिसविपरीत एमसीसीसँग जोडिएका कार्यक्रम र सहायता रकम नीति कार्यक्रम र बजेटमा परेपछि पार्टीभित्र व्यापक विवाद भएपछि मंगलबारलाई सचिवालय बैठक बोलाइएको थियो । एमसीसीलाई लिएर विवाद बढेपछि यसअघि जेठ १७ गते सचिवालय बैठक बसेको थियो । उक्त बैठकमा कार्यदलले बुझाएको प्रतिवेदनबारे छलफल गरेपछि एमसीसीबारे ठोस निर्णय गर्ने सहमति भएको थियो । प्रधानमन्त्री केपी शर्मा ओली भने संसद्को यहि अधिवेशनबाट सम्झौता अनुमोदन गर्ने पक्षमा छन् । तर, सचिवालयका अन्य बहुमत सदस्य भने यथास्थितिमा सम्झौता अनुमोदन गर्न नहुने पक्षमा छन् । एमसीसीकै कारण नेकपाभित्र ठूलै भाँडभैलो र गाँडकोराकोर समेत भइरहेको छ । तर पनि प्रधानमन्त्री जसरी पनि पास गराउने लिँडेढिपी लाग्दा समस्या सिर्जना भएको हो । जबकि एमसीसीको सम्झौता गर्दा नेपाल पक्षलाई कमजोर बनाई अमेरिकी पक्ष बलियो बनाइएको छ । यो सम्झौताले नेपालको राष्ट्रिय स्वाभिमान र आत्मगौरवलाई उठाउने दाबी गर्ने सत्तापक्ष र प्रमुख प्रतिपक्षका नेताहरुको विरुद्ध जनमत खडा भएको छ ।