नायकत्रय अनमोल केसी, सलोन बस्नेत र सलिनमान बनियाँ निकै मिल्ने साथी हुन् । सलोनको बिहेमा पनि सलिन र अनमोलबिचको मित्रता देखिएको थियो । भलै, सलिनको ‘यात्रा’ र अनमोलको ‘ए मेरो हजुर ३’ बक्स अफिसमा एकैसाथ भिडेका थिए । तर, यसले उनीहरूको व्यक्तिगत सम्बन्धमा कुनै असर गरेको छैन । कामको कुरा गर्दा सलोनले निरन्तर फिल्ममा काम गरिरहेका छन् । अनमोल नयाँ फिल्म ‘फर्कि फर्कि’मा काम गर्दैछन् । सलिनमानले भने ‘यात्रा’पछि नयाँ फिल्ममा काम गरेका छैनन् । शुक्रबार नायक सलोन बस्नेतले आफूसहित अनमोल र सलिनसँगको तस्विर पोष्ट गरे । उनले ‘कुकिङ’ भनेर लेखेका छन् । उनले, केही पाकिरहेको छ भनेर उल्लेख गरेका छन् ।
सलोनले पोष्ट गरेको तस्विर र यसमा उल्लेख गरेको क्याप्सनले कतै उनीहरूले एकैसाथ फिल्ममा काम गर्न लागेका त होइनन् भन्ने संकेत गरेको छ । यो विषयमा मेरो फिल्मसँग कुरा गर्दै सलोनले भने–‘हामी तीन जना मिल्ने साथी हौँ । यसैले, समय मिलाएर भेटेका हौँ । फिल्ममा काम गर्ने कुरा अहिले चलेको होइन ।’ सलोन, सलिन र अनमोल एकैसाथ फिल्ममा देखिएको खण्डमा त्यसले बक्स अफिसमा तहल्का मच्चाउने पक्का छ । तर, के यी तीन जना मिल्ने साथीहरू एकैसाथ फिल्ममा काम गर्लान् त ?