काठमाडौं । फेरि नेपालमा २८८ जनामा कोरोना भाइरसको संक्रमण पुष्टि भएको छ । यो सँगै नेपालमा कोरोना संक्रमितको संख्या २ हजार ९९ पुगेको छ । स्वास्थ्य तथा जनसंख्या मन्त्रालयले नियमित लाइभ अपडेटमा नेपालमा हालसम्म २ हजार ९९ जनामा कोरोना भाइरसको संक्रमण पुष्टि भएको जानकारी दिएको हो । मंगलबार दिएको जानकारी अनुसार पछिल्लो २४ घण्टामा देखिएका संक्रमितमध्ये २ सय ७० जना पुरुष र १८ जना महिला रहेका छन् । स्वास्थ्य मन्त्रालयका प्रवक्ता डा। विकास देवकोटाले अहिलेसम्म कोभिड(१९ पुष्टि भएका व्यक्तिको संख्या २ हजार ९९ पुगेको जानकारी दिएका हुन् ।
प्रवक्ता डा देवकोटाका अनुसार धुलिखेल अस्पतालको प्रयोगशालामा गरिएको परीक्षणमा ३८ जनाको पोजेटिभ देखिएको छ । उनीहरुमध्ये रौतहटकी ८ वर्षकी बालिकालगायत १३ देखि ६० वर्ष उमेरका व्यक्तिहरु रहेका छन् । यस्तै प्रादेशिक जनस्वास्थ्य प्रयोगशाला पोखरामा गरिएको परीक्षणमा १० जनाको पोजेटिभ आएको छ । उनीहरु मध्ये स्याङ्जा चापाँकोटका ५ जना क्वारेन्टाइनमा रहेका १० देखि ४० वर्ष उमेर समुहका बालक तथा पुरुषहरु रहेका छन् । यस्तै फलेबाँस क्वारेन्टाइनमा रहेका ५ जना १९ देखि ४० वर्ष उमेर समुहका पुरुषहरु रहेका छन् । बीपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा १ जनाको पोजेटिभ आएको छ । उनी सप्तरीका २० वर्षीय पुरुष हुन् । प्रवक्ता देवकोटाका अनुसार भेरी अस्पतालको प्रयोगशालामा गरिएको परीक्षणमा २० जनामा कोरोना पोजेटिभ आएको छ । उनीहरु बर्दिया गुलरियाका ३ जना २० देखि ३४ वर्षका पुरुष, बाँके खजुरा नगरपालिका, नरैनापुर गाउँपालिका र राप्ती सोनारी गाउँपालिकाका १७ जना रहेका छन् । उनीहरु १७ देखि ४५ वर्षका पुरुषहरु छन् ।
यसैगरी सुर्खेतमा गरिएको परीक्षणमा ६४ जनामा कोरोना पोजेटिभ देखिएको छ । उनीहरु सुर्खेत वीरेन्द्रनगर, लेकबेशी, पञ्चपुरी र भेरीगंगाका २७ जना ८ वर्षीया बालिकासहित ३ महिला र ४ वर्षका बालक देखि ६१ वर्ष सम्मका पुरुष रहेका छन् । दैलेखको नारायणपुरका ९ जना १७ देखि ३१ वर्ष उमेर समुहका व्यक्तिहरुमा पनि कोरोना भाइरसको संक्रमण पुष्टि भएको छ । यसैगरी सल्यानका १८ जना १७ देखि ५० वर्ष उमेर समुहका व्यक्तिहरुमा पनि कोरोना पुष्टि भएको छ । यस्तै अछामका १० जनामा पनि कोरोना संक्रमण पुष्टि भएको छ । उनीहरु २७ र ३० वर्षका २ जना महिला र २२ देखि ३९ वर्ष उमेर समुहका पुरुषहरु रहेका छन् ।
प्रवक्ता डा देवकोटाका अनुसार हेटौंडाको किटजन्य रोग अनुसन्धान तथा तालिम केन्द्रको प्रयोगशालामा एकजनाको पोजेटिभ आएको छ । उनी बाराका एकजना १८ वर्षका पुरुष हुन् । यस्तै राप्ती स्वास्थ्य विज्ञान प्रतिष्ठान दाङमा गरिएको परीक्षणमा दाङका १७ जना रहेका छन् । उनीहरु ११ वर्षका बालिका सहित ४५ वर्ष सम्मका ३ जना महिला र १८ देखि ५५ वर्षका पुरुषहरु रहेका छन् । यस्तै प्युठानको स्वर्गद्धारीका ५९ वर्षका पुरुष रहेका छन्। यस्तै सेती प्रादेशिक अस्पतालको प्रयोगशालामा गरिएको परीक्षणमा १८ जनाको पोजेटिभ आएको छ । उनीहरुमध्ये कञ्चनपुरको पुर्नवासमा क्वारेन्टाइनमा रहेका २८ देखि ५० वर्षका पुरुषहरु ८ जना रहेका छन् । यस्तै कैलालीका १० जना रहेका छन् । उनीहरु १८ वर्षकी एक महिला सहित २० देखि ६३ वर्ष उमेर समुहका पुरुष रेहका छन् । यस्तै राष्ट्रिय जनस्वास्थ्य प्रयोगशाला काठमाडौंमा गरिएको परीक्षणमा १ सय १८ जनाको पोजेटिभ आएको छ । उनीहरु मध्ये धनुषाका ६ जना १५ देखि ५० वर्षका पुरुषहरु, महोत्तरी रामगोपालपुरका २ जना पुरुषहरु, रौतहटका दुर्गा भगवती र राजपुरका गढीमाइमा क्वारेन्टाइनमा रहेका ३६ जना १२ वर्षका बालक देखि ४८ वर्ष उमेर सम्मका छन् ।
यस्तै सर्लाहीको बलरामपुरी क्वारेन्टाइनमा रहेका २१ जना १३ वर्षका बालक देखि ४० वर्ष सम्मका पुरुष, सिराहामा क्वारेन्टाइनमा रहेका १७ जना रहेका छन् । भक्तपुर चाँगुनारायणका एक जना ३० वर्षीया महिलामा पनि कोरोना संक्रमण पुष्टि भएको छ ।
यस्तै धादिङ घर भएकी थापाथलीको प्रसूती तथा स्त्री रोग अस्पतालमा रहेकी २३ वर्षका महिलामा पनि कोरोना संक्रमण पुष्टि भएको छ । यस्तै कपिलवस्तुका १६ जनामा पनि कोरोना संक्रमण पुष्टि भएको छ । प्रवक्ता डा देवकोटाका अनुसार काठमाडौंमा काठमाडौं मेडिकल कलेजका ४ जना स्वास्थ्यकर्मीमा पनि कोरोना संक्रमण पुष्टि भएको छ ।
उनीहरु २४ देखि ३२ वर्षका ३ जना महिला र २८ वर्षका एकजना पुरुष रहेका छन् । उनीहरु सबैजना स्वास्थ्यकर्मी हुन् । यस्तै नवलपरासी पुर्वका वुलिङटा गाउँपालिकाका एक जना १६ वर्षका पुरुष, नवलपरासी पश्चिमका रामग्रामका एक जना २२ वर्षका पुरुष, नुवाकोटाका २ जना १७ र ३२ वर्षका पुरुषहरु, रुपन्देही १० जना १५ देखि ५१ वर्षका पुरुषहरु रहेका छन् ।
डा देवकोटाका अनुसार पछिल्लो २४ घण्टामा ४५ जना डिस्चार्ज भएका छन् । योसँगै डिस्चार्ज हुनेको संख्या २६६ पुगेको छ । कुल ६१ जिल्लामा कोरोना संक्रमणका बिरामी देखिएको मन्त्रालयले जनाएको छ । यसैगरी क्वारेन्टाइनमा रहनेको संख्या १ लाख ४५ हजार ३७५ रहेको छन् । आइसोलेसनमा रहनेको संख्या देशभरी १ हजार ८ सय २५ जना रहेको छ ।

काठमाडौं मेडिकल कलेजका ४ जना स्वास्थ्यकर्मीलाई संक्रमण पुष्टि
काठमाडौं मेडिकल कलेजका ४ जना स्वास्थ्यकर्मीमा पनि कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयले काठमाडौं मेडिकल कलेजमा कार्यरत चार जना स्वास्थ्यकर्मीमा संक्रमण पुष्टि भएको जानकारी दिएको छ। उनीहरु २४ देखि ३२ वर्षका ३ जना महिला र २८ वर्षका एकजना पुरुष रहेका छन् । राष्ट्रिय जनस्वास्थ्य प्रयोगशाला टेकुमा गरिएको नमूना परीक्षणमा उनीहरूमा संक्रमण पुष्टि भएको हो । नेपालमा पछिल्लो २४ घण्टामा थप २८८ जनामा कोरोना भाइरसको संक्रमण पुष्टि भएसँगै कुल संक्रमितको संख्या २ हजार ९९ पुगेको छ ।