काठमाडौँ । नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठ नेकपा एमालेका अध्यक्ष केपी शर्मा ओलीलाई भेट्न पुगेका छन् । निवर्तमान उपप्रधान एवम् गृहमन्त्री श्रेष्ठ मंगलबार बिहान ओली भेट्न निजी निवास बालकोट पुगेका हुन् ।

भेटका क्रममा श्रेष्ठले गृहमन्त्रीमा आफूलाई निरन्तरता दिन आग्रह गरेको बताइएको छ । सत्ता गठबन्धनमा भागबन्डा हुँदा हुँदा गृहमन्त्री माओवादी केन्द्रलाई नै पर्नेगरी छलफल अघि बढाउन ओलीलाई आग्रह गर्दै उनले गृहमन्त्रीमा निरन्तरता चाहेको बालकोट निकट स्रोतले बताएको छ ।

तर, ओलीले भने स्पष्ट जवाफ नदिएको बताइएको छ । सो क्रममा ओलीले गृहमन्त्री रास्वपाले मागेको यथार्थ प्रस्तुत गर्दै सो पार्टीका सभापति रवि लामिछानेले मानेको खण्डमा श्रेष्ठलाई दिन आफूलाई कुनै आपत्ति नरहेको बताएका थिए ।

सत्ता गठबन्धनमा भागबन्डाको विषयमा छलफल भइरहेपनि ठोस सहमति जुटिसकेको छैन । विशेषतः गृहमन्त्रीमा माओवादीसहित रास्वपाको दाबी रहेको छ भने अर्थलगायतका महत्त्वपूर्ण मन्त्रालय पनि कसले पाउने भन्ने निश्चित भइसकेको छैन ।

सत्ता गठबन्धनमा भागबन्डा नटुंगिएकै कारण सोमबार गठबन्धनबाट तीन जना मन्त्रीले विना विभागीयको हैसियतमा शपथ लिएका थिए । आइतबार राति भएको समझदारीअनुसार कांग्रेससँग गठबन्धन तोडेर माओवादी केन्द्रले एमालेसहित रास्वपा र जसपासँग ८ बुँदे सहमति गरेर सत्ता सञ्चालनको निर्णय गरेको छ । नयाँ गठबन्धन सरकारको नेतृत्व प्रचण्डले नै लिएका छन् ।