काठमाडौं। एमालेभित्रको विवादलाई पन्छाएर काँग्रेस सभापतिलाई प्रधानमन्त्री बनाउन हतार गरेको भन्दै रन्किएका एमाले विद्रोही नेता भीम रावललाई फकाउन पुगेका एमाले वरिष्ठ नेता माधवकुमार नेपालाई रावलले एकतामा जानुपर्नेमा जोड दिएका छन् । नेकपा एमालेका वरिष्ठ नेता माधवकुमार नेपाल र उपाध्यक्ष भीम रावलबीचको भेटवार्ता सकिएको छ । रावललाई भेट्न नेता नेपाल टोखास्थित उनकै निवासमा पुगेका थिए । दुई नेताबीच पछिल्लो राजनीतिक घटनाका बारे गम्भीर समिक्षा भएको बुझिएको छ । नेता नेपालले मिलेर अगाडि बढ्न आग्रह गरेको र रावलले एमाले एकतामा नै जोड दिएको बुझिएको छ । रावलले सांसद पदबाट दिएको राजीनामाका सन्दर्भमा पनि नेपालले चासो राखेका थिए । उनले रावललाई राजीनामा फिर्ता लिन आग्रह गरेको बुझिएको छ । रावल आज आफू पक्षीय स्थायी कमिटी बैठकमा अनुपस्थित भएपछि माधव नेपाल निवासमै भेट्न पुगेका हुन् ।