काठमाडौं । प्रधानमन्त्री केपी शर्मा ओलीले कोरोना भाइरसको महामारी समाप्त नभएसम्म आफूले तलब नलिने घोषणा गरेका छन् । नयाँ वर्ष २०७७ को शुभकामना जारी गर्दै प्रधानमन्त्री ओलीले कोरोना भाइरस विरुद्धको युद्ध बलियो एकतामा आपसी सहयोग र समझदारीबाट जित्न सकिने बताएका छन् ।
आवश्यक पर्दा ‘हुनेको गास काटेर, नहुनेलाई बचाउने’ हाम्रो परम्परा पनि भएको बताउँदै प्रधानमन्त्री ओलीले आफू देशको कार्यकारी भएका कारण प्रधानमन्त्रीको रुपमा पाउने तलव नलिने घोषणा गरेका हुन् । शुभकामना सन्देशमा प्रधानमन्त्रीले भनेका छन्, ‘मुलुकको कार्यकारी प्रमुखका हैसियतले कोरोना महामारी समाप्त नभएसम्म मैले आफ्नो पारिश्रमिक ‘कोभिड–१९, प्रधानमन्त्री राहत कोष’मा जम्मा गर्ने निर्णय गरेको छु ।’
नयाँ वर्षको उपलक्षमा प्रधानमन्त्री ओलीले लामो सन्देश जारी गर्दै भनेका छन्, ‘मैले पटकपटक भन्दै आएको छु, यो युद्ध सबैको बलियो एकतामा जितिने युद्ध हो । विश्वव्यापी यस संकटको समाधान विश्वव्यापी प्रयास, साझेदारी र सहयोगबाट मात्र सम्भव छ । देश भित्रको संकट व्यवस्थापनमा एकताबद्ध राष्ट्रिय प्रयास सर्वोपरि रहनुपर्छ । मुलुक प्रगतिमा रहेको बेला हुने उपलब्धिको न्यायोचित वितरण र अप्ठ्यारोमा हुने क्षतिको सह–भारबहन हामी सबैले नै मिलेर गर्नुपर्छ । आवश्यक पर्दा ‘हुनेको गास काटेर, नहुनेलाई बचाउने, त हाम्रो परम्परा पनि हो । मुलुकको कार्यकारी प्रमुखका हैसियतले कोरोना महामारी समाप्त नभएसम्म मैले आफ्नो पारिश्रमिक ‘कोभिड–१९, प्रधानमन्त्री राहत कोषमा जम्मा गर्ने निर्णय गरेको छु ।