नेपालबाट हिँडेरै अमेरिका प्रवेश गर्ने नेपालीहरुको कथामाथि निर्माण हुन लागेको सिनेमा ‘कामिनो’ आगामी असार १५ गतेबाट छायांकनमा जाने भएको छ।
नायक प्रदीप खड्का, नायिका नीति शाह लगायतका कलाकारको अभिनय रहेको यो फिल्मको छायांकन नेपाल र फिलिपिन्समा मात्र हुने भएको छ। यस अघि फिल्मको केही दृष्य मेक्सिकोमा पनि छायांकन हुने सेड्युल थियो। तर मेक्सिकोले भिसा नदिएपछि फिल्म नेपाल र फिलिपिन्समा मात्रै खुम्चिन पुगेको हो। एक महिना फिलिपिन्समा बसेर बिहीबार मात्र नेपाल फर्किएका निर्देशक दीपक वलीले मेक्सिकोको भिसा नलाग्दा अब फिलिपिन्समै दृश्य खिच्नुपर्ने अवस्था आएको बताए। उनले भने, ‘हामीले मेक्सिकोको लागि भिसा प्रयास गरेका थियौं। तर, भिसा लागेन। मुख्यतया हाम्रो कथा ब्राजिल र मेक्सिकोको जंगल र समुन्द्रमा बढी केन्द्रित छ। अब, फिलिपिन्सकै जंगलमा खिच्छौँ।’ फिल्मको कथाले अमेरिका प्रवेश नमाग्ने वलीले बताए। मेक्सिकोको दृश्यलाई भीएफएक्स गरेर भएपनि देखाउने निर्देशक वलीको तयारी छ। असार १५ बाट छायांकनमा जाने फिल्मको फिलिपिन्समा ४५ दिन सुटिङ हुने छ। यसपछि नेपाल फर्किएर फिल्मको बाँकी दृष्य छायांकन गर्ने वलीले बताए।