काठमाडौँ । निकै लामो तपस्यापछि प्रधानमन्त्री केपी शर्मा ओलीको भारत भ्रमणको बाटो खुलेको छ । दुवै मुलुकले औपचारिक रूपमा भ्रमणको मिति सार्वजनिक नगरे पनि नेपाली र भारतीय मिडियामा भ्रमणको सम्भावित तालिका सार्वजनिक भइरहेको छ । दुवै मुलुकका मिडियाले आ–आफ्ना स्रोतबाट प्राप्त सूचनालाई आधार बनाएर ओलीको भारत भ्रमण सेप्टेम्बर १६–१७ अर्थात् भदौ ३१–असोज १ गतेसम्म हुने जनाएका छन् । भ्रमणका तयारी, निम्तिन सक्ने सम्भावित परिस्थिति लगायतलाई ध्यानमा राखेर यस्ता मिति सार्वजनिक गर्न नहतारिने कूटनीतिक अभ्यास विश्वव्यापी छ । सोही कारण पनि दुवै मुलुकले भ्रमणको मिति अहिले नै औपचारिक रूपमा सार्वजनिक नगरेका हुन सक्छन् । अहिले मिडियामा आएकै मिति अर्थात् सेप्टेम्बर १६–१७ मा ओलीको भारत भ्रमण हुने हो भने त्यो समय निकै खास एवं महत्त्वपूर्ण हुनेछ । किनकि भारतका प्रधानमन्त्री नरेन्द्र मोदीको जन्मदिन सेप्टेम्बर १७ मै पर्दछ र सार्वजनिक भएका सूचना अनुसार त्यही दिन नै उनले नेपालका समकक्षी ओलीसँग भारतको बोधगयामा भेटवार्ता गर्ने तयारी छ । ओली प्रधानमन्त्री भएको करिब १३ महिनापछि भारत भ्रमणको औपचारिक निमन्त्रणा पाएका हुन् । भारतका विदेश सचिव विक्रम मिस्रीले नेपाल भ्रमणका क्रममा आइतबार ओलीलाई भारत भ्रमणको औपचारिक निमन्त्रणा हस्तान्तरण गरेका हुन् । प्रधानमन्त्रीको जिम्मेवारी सम्हालेको लामो समयसम्म भारत भ्रमण गर्न नसकेको भन्दै विपक्षीले ओलीको आलोचना गर्दै आएका थिए । भ्रमणका लागि भएको ढिलासुस्तीकै कारण कतिपयले नेपाल–भारत सम्बन्ध बिग्रिँदै गएको उदाहरणका रूपमा समेत व्याख्या गरेका थिए । ओलीको भारत भ्रमण हुने लगभग निश्चित भइसकेको छ र सम्भावित तालिकासमेत विभिन्न स्रोतमार्फत सार्वजनिक भएको छ । जसअनुसार भारतीय प्रधानमन्त्री मोदीकै जन्मदिन पारेर ओलीको भ्रमण हुन लाग्नु संयोगमात्र हो या साइत नै यस्तै जुरेको हो भन्नेबारे अब स्वाभाविक रूपमा चर्चा हुने देखिन्छ ।