काठमाडौं । अविरल वर्षाका कारण मकवानपुरको इन्द्रसरोवरस्थित कुलेखानी जलाशयमा पानीको सतह निरन्तर बढिरहेको छ। आइतबार बिहान ६ः३० बजेको मापनअनुसार जलाशयमा पानीको सतह १ हजार ५२५ दशमलव १५ मिटर पुगेको छ।

शनिबार बिहानसम्म जलाशयमा पानीको सतह १ हजार ५२३ दशमलव ९० मिटर रहेको थियो। पछिल्लो २४ घण्टामा पानीको सतह १ दशमलव २५ मिटरले बढेको हो।

कुलेखानी जलाशयमा अधिकतम १ हजार ५३० मिटरसम्म पानी भण्डारण गर्न सक्ने क्षमता छ। तर जलाशयमा पानीको चाप र सम्भावित जोखिमलाई ध्यानमा राख्दै सतह १ हजार ५२७ मिटर पुगेपछि बाँधबाट पानी बिस्तारै छाड्ने तयारी गरिएको कुलेखानी प्रथम जलविद्युत् आयोजनाका कार्यालय प्रमुख प्रल्हाद राउतले जानकारी दिए।

उनका अनुसार अहिले जलाशयको पानी निर्धारित जोखिम तहभन्दा करिब २ मिटर तल रहेकाले तत्काल जोखिमको अवस्था छैन। यद्यपि निरन्तर वर्षा भइरहेकाले जलाशयमा पानीको आगमन अझ बढ्न सक्ने सम्भावना रहेकाले आयोजनाले जलस्तर र पानीको बहावलाई निरन्तर निगरानी गरिरहेको छ।

जलाशयको सतह १ हजार ५२७ मिटर पुगेपछि आवश्यकताअनुसार बाँधबाट क्रमशः पानी छाडिने राउतले बताए। पानी छाड्नुअघि साइरन बजाएर तल्लो तटीय क्षेत्रका बासिन्दालाई पूर्वसूचना दिने व्यवस्था गरिएको आयोजनाले जनाएको छ।

आयोजनाका अनुसार पानीको सतह अधिकतम भण्डारण क्षमतातर्फ बढ्दै गएमा वर्षाको अवस्था, जलाशयमा पानीको आगमन र समग्र जोखिमको मूल्यांकन गरी आवश्यक निर्णय लिइनेछ।

पूर्ण क्षमतामा विद्युत् उत्पादन

यसैबीच, कुलेखानी जलविद्युत् आयोजनाबाट अहिले पूर्ण क्षमतामा विद्युत् उत्पादन भइरहेको छ। विद्युत् उत्पादनका लागि आयोजनाका सबै मेसिन सञ्चालनमा रहेकाले जलाशयमा पानी जम्मा हुने दरलाई समेत केही हदसम्म नियन्त्रण गर्न सहयोग पुगेको राउतले बताए।

जलाशयमा पानीको सतह बढ्दै गएपछि तल्लो तटीय क्षेत्रका बासिन्दामा चासो बढेको छ। तर आयोजनाले हाल पानीको अवस्था निर्धारित सीमाभित्रै रहेकाले तत्काल आत्तिनुपर्ने अवस्था नरहेको जनाएको छ।

आयोजनाले मौसमको अवस्था, जलाशयमा भइरहेको पानीको आगमन र पानीको सतहलाई निरन्तर निगरानी गरिरहेको छ। पानीको सतह तोकिएको तहमा पुगेमा बाँधबाट पानी छाड्ने र त्यसअघि सम्बन्धित क्षेत्रलाई साइरन तथा अन्य माध्यमबाट जानकारी गराउने तयारी गरिएको छ।