काठमाडौं । गायिका आस्था राउत सोमबार बिहान प्रहरी परिसर काठमाडौंमा उपस्थित भएकी छन् । काठमाडौं प्रहरी परिसरका प्रमुख उत्तम सुवेदीका अनुसार आस्था आफैं प्रहरी कार्यालयमा उपस्थित भएकी हुन् । “प्रहरीको तर्फबाट अनुसन्धान पूरा भइसकेको छ,” सुवेदीले भने, “जिल्ला सरकारी वकिलले बयान सकेपछि जिल्ला प्रशासन कार्यालयमा उपस्थित गराउँछौं ।” आस्था र प्रहरीबीच अघिल्लो साता त्रिभुवन विमानस्थलमा भएको विवादपछि उनलाई प्रहरीले खोजी गरेको थियो । भारत जाने क्रममा झापाको उडान भर्ने बेला त्रिभुवन विमानस्थलमा चेकजाँचका क्रममा प्रहरीले आफूलाई हातपातसहित दुर्व्यवहार गरेको गायिका राउतको आरोप छ ।
उनले सामाजिक सञ्जाल फेसबकुमार्फत प्रहरीलाई गाली गरेको भन्दै प्रहरीले पनि उक्त विषयमा अनुसन्धान सुरु गरेको जनाएको छ । “हामीले हेरेको सीसीटीभी फुटेजमा आस्थाकै गल्ती देखिन्छ,” प्रहरी स्रोतले भन्यो ।
विमानस्थलमा खटिएकी प्रहरी जवानले उनीविरुद्ध जाहेरी दिएकी थिइन् ।