जनकपुरधाम । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले प्रधानमन्त्री केपी शर्मा ओलीले वर्तमान संविधान नै खारेज गर्न खोजिरहेको आरोप लगाएका छन् । सोमबार जनकपुर विमानस्थलमा सञ्चारकर्मीहरूसँग कुराकानी गर्दै दाहालले प्रधानमन्त्री ओली संविधान खारेज भएर परिवर्तनको उपलब्धि बर्बाद होस् भन्ने पक्षमा रहेको बताएका हुन् । ओलीले त आन्दोलनबाट प्राप्त परिवर्तनका सबै उपलब्धि बर्बाद होस्, संविधान नै खारेज होस् भन्ने चाहनु भएको छ, दाहालले भने । ओलीले अघिल्लो कार्यकालमा दुई–दुई पटक संसद् विघटन गर्नुको तात्पर्य पनि संविधान खारेजी रहेको उनले जिकिर गरे । वर्तमान सरकारले ल्याएको अध्यादेश राष्ट्रिय सभाबाट पारित नहुने उनले ठोकुवा गरे । जनता समाजवादी पार्टी जसपा नेपालले अध्यादेशमा समर्थन गर्न नहुने प्रचण्डले जिकिर गरे । प्रक्रिया र कतिपय सारको दृष्टिकोणले पनि भूमिसम्बन्धी विषयमा आएको अध्यादेश गलत रहेको उनको जिकिर छ ।राष्ट्रियसभामा बहुमत नपुग्ने भएकाले नै अध्यादेश सदनमा नपुगी अड्किएको उनले बताए । सदनमा अध्यादेश प्रस्तुत नगरी रोकिएर बसेका छन् । तपाईंहरूले राष्ट्रिय सभाको स्थिति बुझिराख्नु भएकै छ। त्यहाँ अगाडि बढ्न सकिरहेको स्थिति छैन । सरकारले सदन बोलाउने बेला गलत नियतले अध्यादेश ल्यायो, उनले भने, प्रक्रियाको दृष्टिकोणले पनि र कतिपय सारको दृष्टिकोणले पनि भूमिसम्बन्धी विषय जसरी ल्याइएको छ, त्यसको उद्देश्य गलत देखिएको छ । त्यो कुरामा सदनमा मैले भनेको छु, हाम्रो दलले बाहिर पनि भनेको छ । अध्यक्ष प्रचण्डले वर्तमान सरकारबाट आशा गर्न सकिने ठाउँ नै नरहेको दाबी गरे । यसबाट धेरै राम्रो कुराको आशा गर्ने ठाउँ सुरुदेखि थिएन । यो सरकार संविधान मिचेर बनेको हो । संविधानको ७६ (२) अनुसार मैले प्रधानमन्त्रीको रुपमा विश्वासको मत लिँदा असफल भएपछि सिधै ३ मा गएर ठूलो दलको सरकार बन्ने हो, उनले भने, संविधानमा अर्को कुनै ठाउँ छैन । यो लोकतन्त्रको मर्मविपरीत पनि छ । संसदीय लोकतन्त्र भन्ने ठाउँमा पहिलो र दोस्रो दल मिलेर सरकार बन्दैन । नेपालमा लोकतन्त्रको मर्मविपरीत भयो । यसबाट धेरै आश गर्ने कुरा छैन ।